14:30 13 ноября 2015 г.
вăхăт нумай юлмарĕ
Çак уйăх вĕçĕнче Вăрнарти 39 çемье çĕнĕ хваттерсен уççисене илĕ, кивĕ çурт-йĕртен хăтлă та çутă пÿлĕмсене куçĕ.
Çапла районта «Граждансене аварийлă çурт-йĕр фондĕнчен куçарасси» адреслă программăн иккĕмĕш тапхăрĕ вĕçленĕ. Кăçал ку тĕллевпе вăрнарсене пĕтĕмĕшле 40 млн та 603 пин те 198 тенкĕ ытларах тивĕçнĕ.
Хуçалăхсем хушшинчи «Вурнарская» организаци çĕнĕ кĕтес кĕтекенсем валли Зеленăй тăкăрлăкра уйрăм çурт çĕклерĕ. 39 хваттертен 21-шĕ – пĕр, 18-шĕ – икĕ пÿлĕмлисем. Вĕсене пурне те социаллă мĕнпур условипе тивĕçтереççĕ.
Пĕрремĕш тапхăрпа районта 43 çемье пурнăç условийĕсене лайăхлатнăччĕ. Килес çул, программăн виççĕмĕш тапхăрĕнче те 43 çемье хваттер кĕтет. Ку тĕллевпе Вăрнарта 39 хваттерлĕ тата тепĕр çурт çĕклеме палăртнă. Çапла, 2017 çулччен списока кĕнисем пурте хăтлă çуртсене куçĕç.
Район администрацийĕн строительствăпа пурăнмалли çурт-йĕрпе коммуналлă хуçалăх пайĕн пуçлăхĕн заместителĕ Вячеслав Ильин аварийлă 36 çурта тĕппипех пăсассине пĕлтерчĕ.
Анчах та районта кунпах ыйту татăлмасть-ха. Вăрнарти Путевая урамри унчченхи СМП çурчĕсем тĕлĕшпе проблема пур. Вячеслав Вячеславович вĕсен шăпине çĕнĕ программа татса парассине пĕлтерчĕ.
С.ЧИКМЯКОВА.
Марина АЛЕКСАНДРОВА:
– Çĕнĕ хваттере пирĕн çемье 20 çул кĕтнĕ. Алла уçă илнĕ самантри туйăмсем халĕ те чуна ăшăтаççĕ. Ку микрорайонта (Тракторнăй тăкăрлăк) ман ачалăх иртнĕ, кунти уçланкăри площадкăра сахал мар спорт вăййисенче пиçĕхнĕ. Çавăнпа хваттер чĕрене çывăх вырăнта тивĕçни те кăмăла çĕклет. «Вурнарская» МСО строителĕсене тав тăватăп. Пÿлĕмсем çутă, пĕтĕм услови çителĕклĕ, кĕр те пурăн: сантехника вырнаçтарнă, обойсем çыпăçтарнă, пластик чÿречесем тата ытти те. Путвал пысăк, урайне бетонланă. Халĕ ку программăпа çĕкленекен çуртăн балконсем çук. Телее, пирĕн çуртри кашни хваттерте пур вĕсем. Республика правительствине, район ертÿлĕхне, ыттисене пысăк тав.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии