09:45 28 октября 2015 г.
Hайон Пухăвĕн депутачĕсен черетлĕ виççĕмĕш ларăвĕнче район администрацийĕн пуçлăхне çирĕплетесси тĕп тема пулчĕ тесен те йăнăш мар
Пĕр-ик сехет маларах администрацире республика представителĕсем хутшăннипе конкурс комиссийĕн ларăвĕ иртнĕ. Должноçа йышăнма тăратнă виçĕ кандидатран Леонид Николаев çĕнтернине палăртнă.
Пĕлетпĕр ĕнтĕ, Леонид Григорьевич район администрацине унччен те тăватă çул ăнăçлă ертсе пычĕ. «Малашлăх планĕсем пĕчĕк мар», – терĕ вăл район умĕнче тăракан çивĕч ыйтусене палăртса.
Тĕп проблемăсен шутне Леонид Григорьевич малтанах пурăнмалли çурт-йĕрпе коммуналлă хуçалăхри ыйтусене кĕртрĕ. Вăл шутра – ăшăпа, ĕçмелли пахалăхлă шывпа тивĕçтересси, котельнăйсене модернизацилесси, йăлари каяшсен полигонĕнче йĕрке кĕртесси тата ытти те.
Ял хуçалăхĕнче, вĕрентÿре, медицинăра кадрсем çитмеççĕ. Ку енĕпе шкултанах ĕçлемелле, палăртрĕ Леонид Григорьевич.
Шкул çулĕчченхи вĕрентÿ тавра калаçнă май, вăл ача сачĕсене кĕçĕннисене çулталăк çурăранах вырнаçтарасси патне ăнтăлмаллине асăнчĕ. Вăрнарта çĕкленнĕ 145 вырăнлă садик ыйтуллă объектсен шутĕнчине те манмарĕ.
Культурăра та ыйтусем пур. Хăш-пĕр ялта акă клуб çуккине уйрăмах хытă туяççĕ. Республикăра культура учрежденийĕсен сетьне çĕклес программăна планлаççĕ. Вăл ĕçлесе кайсан унта Вăрнар ялĕсем те кĕрес шанăç пур.
– Район аталанăвĕшĕн пĕрлешсе, пĕр тĕллевпе ĕçлемелле. Требованисем çирĕп пулĕç, – пĕтĕмлетрĕ Леонид Николаев.
Республикăри хĕрарăмсен канашĕн председателĕн Ольга Зайцеван шухăшĕ те тĕрĕс. Паянхи кун халăх влаçран ыйтасси палăрмаллах ÿсрĕ. Анчах та общественноç пĕрлехи ĕçе хăйĕн вăйне хушмасан вырăнтан куçма хĕнтерех. Малалла! Лайăх кăтартусем патне – ăнăçу сунчĕ вăл.
«Август» Фирмăн «ВХПЗ» филиалĕн директорĕ Владимир Свешников Леонид Николаева шанăçа тивĕçнипе саламланă май завод район ыйтăвĕсене татса пама хутшăнма хатĕррине пĕлтерчĕ.
Депутатсен Пухăвĕнче Вăрнар районĕн Уставне улшăнусем кĕртессине, тăхăр уйăхри социаллă пурнăçпа экономика аталанăвĕн кăтартăвĕсене, район бюджетне тÿрлетÿсем кĕртессине пăхса тухса çирĕплетрĕç.
Кун йĕркинче çавăн пекех районти хăш-пĕр вĕрентÿ учрежденийĕсене реорганизацилес ыйтăва та пăхса тухрĕç. Унпа килĕшÿллĕн Малти Ишекри шкула Кăмашри шкулпа, Хапăсри шкула «Сказка» ача сачĕпе, Вăрманкасри шкула «Петушок» ача сачĕпе, Кульцаври шкула «Солнышко» ача сачĕпе, Туçи Мăратри шкула Çавалкасри «Сеспель» ача сачĕпе пĕрлештерме йышăннă.
Депутатсем çирĕплетнипех малашне районта обществăлла йĕркене сыхлакан халăх дружинникĕсене укçан хавхалантарĕç. Çитес уйăхран мунча тивĕçтерĕвĕн хакĕсем улшăнĕç: 5 çулчченхи ачасене малашне тÿлевсĕр, 5–10 çулсенчи ачасене çур хакпа çăвăнтарма çăмăллăхсем туса панă.
С.ЧИКМЯКОВА.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии