09:42 28 октября 2015 г.
Калинино шкулĕнчи 9-мĕш кадет класĕ халь çак тĕллевпе пурăнать
Çирĕп шухăша ачасем «Сыны Отечества» Çĕмĕрлере ирттернĕ конкурс хыççăн тытнă. 29 шкул, аслăрах классем хушшинче иккĕмĕш вырăн хăйсемшĕн чыслă пулнине ăнланаççĕ пулин те çĕнтерÿ пирки ĕмĕтленме пăрахмаççĕ вĕсем. Бал ташши яланхиллех – чи лайăххи. Стройпа утассипе вĕсене çитекен пулман...
Ачасем малалла талпăнни – ырă пулăм. Унсăрăн май та çук. 9-мĕш классем кăçал йĕркеленĕ 5-мĕш класри кадетсемшĕн те тĕслĕх пулса тăраççĕ-çке.
– Конкурса районтан виçĕ команда – пирĕнсĕр пуçне Çĕрпел тата Мăн Явăш шкулĕсенче вĕренекенсем хутшăннине те ырламалла. Конкурентлăх пулни çав тери аван, мĕншĕн тесен вăл çĕнтереслĕх туйăмне ÿстерет, – палăртать шкул директорĕ Татьяна Ефимова.
Шкул ачасене патриотизмла воспитани парас ĕçре наставниксем пуррипе те мăнаçланать: Эрик Васильев, Иван Николаев, Валерий Кошкин, Евгений Паршин, ыттисем. «Çак çынсем чăваш ачисене пулăшни хăпартлантарать. Вĕсем тăрăшнă чухне пирĕн те ахаль лармалла мар», – тет Татьяна Павловна.
Калинино шкулĕ кăçал 170 çулхи юбилейне ирттерме хатĕрленет. Уяв тăванлăх, патриотлăх туйăмĕпе туласси халех паллă – сумлă хăнасем хушшинче наставник-офицерсем те чылаййăн пулĕç.
С.ЧИКМЯКОВА.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии