09:14 24 октября 2015 г.
Ĕнер Чăваш Республикин физкультурăпа спорт министрĕн Сергей Шелтуковăн Вăрнар районĕнчи ĕçлĕ çÿревĕ йывăр атлетика енĕпе Виктор Андреева халалласа ирттернĕ республика первенствинче çамрăк спортсменсене саламланинчен пуçланчĕ.
– Сирĕн вăрнарсен легендарлă штангисчĕсем – турнира халалланă тĕнче рекордсменĕ Виктор Андреев тата Пĕтĕм тĕнчери Универсиадăн кĕмĕл призерĕ Вячеслав Ластухин пек çĕкленме вăйран тăрăшмалла, çакăн валли паян пĕтĕм условисем çителĕклĕ, – терĕ вăл «Вурнарский» спорткомплексра парада тăнă йывăр атлетика тусĕсене.
Район администрацийĕн пуçлăхĕн тивĕçĕсене вăхăтлăха пурнăçлакан Вячеслав Горбунов спорт – пурнăç ăнăçăвĕн никĕсĕ пулнине аса илтерчĕ.
Сумлă турнира Вăрнар çамрăкĕсенчен улттăн хутшăнчĕç. Вĕсем Универсиада призерне хатĕрленĕ паллă тренер Юрий Агилов патĕнче ăсталăха туптаççĕ.
Турнир умĕнхи парада тухнă спортсменсен нумайăшĕн тантăшĕсенчен те тĕслĕх илмелли пулчĕ. Етĕрне, Елчĕк çамрăкĕсем акă Раççей спорт мастерĕн, тĕнче класлă спорт мастерĕн удостоверенийĕсене, Патăрьел каччи – Пĕтĕм Раççейри спартакиада финалне тухнăшăн министерство Тавне тивĕçрĕç.
Чăваш ен физкультурăпа спорт министрĕ Сергей Шелтуков район администрацийĕн социаллă аталану пайĕн пуçлăхĕн заместителĕпе Сергей Политовпа пĕрле çавăн пекех «Химик» стадионта искусствăлла футбол уйĕнчи строительствăпа, фитнес-центр ĕçĕ-хĕлĕпе паллашрĕ, йĕлтĕр бази валли уйăрма палăртнă лаптăка çитсе курчĕ. «Тăрăллă пăр катокĕнчи лару-тăру ăна пăшăрхантарчĕ. Ыйтăвĕ каллех укçа-тенкĕпе çыхăннă, çавна май объекта ăшă вăхăтра çитеймерĕ», – пĕлтерчĕ Сергей Политов министрпа сывпуллашнă хыççăн.
Çак вăхăтра вара спорткомплексри помост çинче тĕрлĕ виçе категорийĕнче кĕрешÿсем çивĕч пычĕç.
С.ЧИКМЯКОВА.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии