08:44 21 октября 2015 г.
Район администрацийĕнче тунтикунсерен иртекен планеркăра кун йĕркине кĕртнĕ темăсемпе пĕрлех çивĕч ыйтусене те хускатаççĕ.
Хальхинче тĕп калаçура районти вĕрентÿ ĕç-хĕлне пăхса тухрĕç. Пĕтĕмĕшле çитĕнÿсемпе – конкурссенче çĕнтерни, юсавсем ирттерни, пурлăх базине пуянлатни... – пĕрлех тытăмра шухăшлаттаракан самантсем пур-ха. Чи çивĕччисен шутне вĕрентÿпе çамрăксен политикин пайĕн пуçлăхĕн заместителĕ Инна Егорова ача сачĕсене черете чакарассине кĕртрĕ. Паянхи кун тĕлне списокра – çулталăк çурăран иртнĕ 288 ача.
Ыйтуран тухма тăвакан ырă ĕçсем пур, паллах. Районти шкулсенче кĕске вăхăтлăх 26 ушкăн йĕркеленĕ. Кĕçĕн Кипекри тата Çĕрпелти шкулсен çумĕнче 50-шар ача валли уçнă ушкăнсем кунĕпех ĕçлеççĕ. Кÿстÿмĕр шкулĕ çумĕнчи «Ивушка» ача садĕнче ытларах ачана çÿреме майсем туса панă. Ку уйăх вĕçĕнче поселокри 145 вырăнлă «Ручеек» учреждени ĕçлесе кайни те черете самаях кĕскетме май парĕ.
Тытăмри тепĕр çивĕч ыйту вăл – çамрăк специалистсем шкулсене килменни. Учительсен вăтам ÿсĕмĕ паян 43 çулпа танлашать. Кăçал, пĕлтернĕччĕ ĕнтĕ, района икĕ çамрăк педагог çеç килнĕ.
Планеркăна ертсе пынă май, район администрацийĕн пуçлăхĕн тивĕçĕсене вăхăтлăха пурнăçлакан Вячеслав Горбунов ытти службăсенчи ыйтусемпе те кăсăкланчĕ.
Оперативлă лару-тăрăва илес пулсан (унпа полицин обществăлла йĕркелĕхе сыхлас енĕпе ĕçлекен пай пуçлăхĕн заместителĕ Андрей Сорокин паллаштарчĕ) канмалли кунсенче граждансенчен 36 пĕлтерÿ килнĕ.
Уйкас Юнтапара çемьери харкашу инкеклĕ вĕçленнĕ. Кил хуçи хĕрарăмĕ çула çитмен икĕ ачи çинчен шухăшламасăр пĕрле пурăнаканне чиксе вĕлернĕ. Тискерле ĕç тăвакан маларах та çемье çинчен ытлашшиех шутламан, тăтăшах хаяррине сыпкаланă иккен – А.Сорокин ку килти условисем çав тери ăнăçсăр пулнине пĕлтерчĕ.
Çавăн пекех вăл канмалли кунсенче эрех ĕçнипе Вăрнарти 37-ри, Мăньял Хапăсри 52-ри арçынсен пурнăçĕсем татăлнине пĕлтерчĕ.
Вăрнарти А.Иванов урамĕнчи 36-мĕш çурт умĕнчи автомашина аккумуляторне вăрлани водительсене управлăрах пулма хистет. Преступление уçса парассипе хальлĕхе оперативлă шырав мероприятийĕсем пыраççĕ. Иртеменкасси çывăхĕнче авари çырăннă. Юрать, водителĕн телейĕ çумра пулнă.
«Полици тата ачасем» акци пуçланнă май, йĕрке хуралçисем ку эрнере вĕрентÿ учрежденийĕсене çитĕç.
Районти тĕп больницăн тĕп врачĕ Николай Тинюков сывлав çулĕсен вируслă чирĕсем тĕлĕшпе лару-тăру йывăр маррине палăртрĕ. Юлашки вăхăтра шкулсене, ача сачĕсене карантина хупни пулман. Çакă çынсене иммунизациленипе те çыхăннă. Мĕнпур ачасен 42 процентне грипран прививка тунă. Эрнекун аслисем валли те 5700 вакцина кÿрсе килнĕ. Прививкăна инфекци пÿлĕмĕнче тÿлевсĕрех тăваççĕ.
Лару вĕçĕнче район депутачĕ, «Химик» спорт клубĕн председателĕ Евгений Захаров тепĕр çивĕч ыйтăва çĕклерĕ. Йĕлтĕр трассине пăхса çаврăннă май, кунта ÿкме пултаракан çĕрĕшнĕ йывăçсем нумаййине палăртрĕ, çавна май комисси йĕркелеме сĕнчĕ. «Ыйтăва тимлĕхрен кăлармалла мар, – палăртрĕ Вячеслав Горбунов. – Çынсен, ачасен хăрушсăрлăхĕ тĕп вырăнта пулмалла».
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии