08:43 21 октября 2015 г.
Паянхи нумай çамрăк çемьен пĕрремĕшле ыйтăвĕ вăл – харпăр хăй çурт-йĕрĕллĕ пуласси. Чăн та, ытларахăшне хăйсен вăйĕпе çĕкленме йывăр, çавăнпа та кун чухне патшалăх пулăшăвне туйни çав тери пĕлтерĕшлĕ.
Районта акă çурт çĕклес, хваттер туянас текен 131 çамрăк çемье федераллă тĕллевлĕ программăпа черетре тăрать. Ку çула района субсидисем валли 7 млн та 905 пин те 944 тенкĕ уйăрнă. Патшалăх пулăшăвĕ 14 çамрăк мăшăра тивĕçмелле.
Эрнекун вĕсенчен 12-шĕ социаллă тÿлеве илме ирĕк паракан свидетельствăна алла илчĕ ĕнтĕ. Район администрацийĕнче çамрăксене хаклă документа район администрацийĕн пуçлăхĕн тивĕçĕсене вăхăтлăха пурнăçлакан Вячеслав Горбунов парса чысларĕ, çĕнĕ кĕтесре çемьен çирĕплĕхне упраса пурăнма сунчĕ.
Пуçламăш хывăм пĕчĕкех мар, виçĕ çынран тăракан çемьене вăтамран 434 пин те 700 тенкĕ тивĕçет.
Мăшăрсенчен ытларахăшĕ хатĕр пурлăх туянасшăн. Яллă вырăнта пурăнакан темиçе çемье субсидие уйрăм çурт çĕклеме ярасшăн.
Сертификата илекенсене Вăрнар хула поселенийĕн администрацийĕн пуçлăхĕ Анатолий Старовойт саламларĕ. Район администрацийĕн строительствăпа ЖКХ пайĕн тĕп специалист-эксперчĕ Анна Артемьева документсене йĕркелемелли ыйтусене ăнлантарчĕ.
С.ЧИКМЯКОВА.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии