16:17 20 октября 2015 г.
Кĕрхи призыв пынă май, районта çар воспитаниллĕ тĕрлĕ мероприятисем йĕркелеççĕ. Иртнĕ эрнере призыв комиссийĕн ларăвĕ, эрнекун вара Призывник кунĕ пулнă.
Вăрнар районĕнчен кĕрхи призывпа 50 çамрăк салтак аттине тăхăнма тивĕç. Вĕсенчен 39-шĕ повесткăсем илнĕ ĕнтĕ. Пĕрремĕш тапхăрпа каччăсене Раççей çарне октябрĕн 25-тата 27-мĕшĕсенче ăсатаççĕ, ыттисене – ноябрьте. Тĕпрен илсен, ку призыврисен служби Мускав тата Ленинград облаçĕсенче иртĕ.
Çар комиссариачĕн Йĕпреç тата Вăрнар районĕсенчи пайĕн пуçлăхĕ Владимир Венедиктов пĕлтернĕ тăрăх, çулсерен контрактниксен шучĕ те ÿссе пырать. Вăрнар районĕнчен кăçал ку мелпе службăна 16 çамрăк кĕнĕ.
Патриотизм воспитанине çÿллĕ шая лартнăранах пулĕ, юлашки çулсенче арçын тивĕçне пурнăçлассинчен тарса çÿрекенсен шучĕ самаях чакнă. Паянхи каччăсем ку Тăван çĕршыв умĕнчи яваплăх пулнине аван ăнланаççĕ.
Призывник кунĕнче салтака кайма ят тухнисене район администрацийĕн пуçлăхĕн тивĕçĕсене вăхăтлăха пурнăçлакан Вячеслав Горбунов, вĕрентÿпе çамрăксен политикин пайĕн пуçлăхĕн заместителĕ Инна Егорова, çар комиссариачĕн пайĕн пуçлăхĕ Владимир Венедиктов, ыттисем саламланă.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии