16:17 21 октября 2015 г.
Раççей – арканми йăла-йĕркепе пуян çĕршыв. Шел пулин те, авалхи историпе çыхăннă хăш-пĕр пулăмсем манăçас еннелле сулăнчĕç. Вăхăт çын астăвăмне хавшатни, тепĕр чух вуçех те пĕрле илсе кайни вăрттăнлăх мар. Тен, çулсем иртнĕçемĕн историре тарăн йĕр хăварнă, Тăван çĕршывшăн кар тăнă çирĕп те чăтăмлă çынсен ячĕсене те пурте пĕлмĕç. Çавăнпа та çитĕнекен ăрăва гражданла воспитани парас енĕпе чылай ĕçлемелле. Ачасен патриотизм туйăмне аталантарсах тăмалла. Пирĕн патшалăхăн шăпи граждансен яваплăхĕнчен нумай килет. Çитĕнекен хĕрсемпе ывăлсем хастар, хыт утăмлă пулни – Тăван çĕршывăн малашнехи çутă кун-çулĕ.
Чăрăшкас Хирлеп шкулĕнче ачасене Тăван çĕршыва юратма вĕрентесси, патриот туйăмĕсене аталантарасси малти вырăнта тăрать. Класс ертÿçисем тĕрлĕ мероприятисенче çивĕч ыйтусене пĕрре мар сÿтсе яваççĕ. Вырăс чĕлхипе литературине вĕрентекен М.И.Иванова 9-мĕш класра граждан тивĕçĕ, чыс пирки тĕплĕн ăнлантарчĕ. Тăван халăх умĕнче таса пулни, çĕршыва чăннипе юратни пуласлăхшăн çав тери хаклă пулнине Г.Р.Державин пултарулăхĕпе çирĕплетрĕ. Классикăн «Властителям и судьям» оди чăн-чăн тĕслĕх пулчĕ.
Тăван çĕршыв умĕнче тивĕçлĕ çын тус-юлташсемпе те таса, тÿрĕ кăмăллă. Паянхи пурнăçра чăн-чăн тус тупма çăмăл мар, çапах та хăв евĕклĕ пулсан юлташусем те тараватлă пулĕç. Чăваш чĕлхипе литературине вĕрентекен А.В.Яковлева ертсе пыракан пуканесен театрĕн артисчĕсем те çакна палăртрĕç. Çамрăк артистсем куракансене Г.В.Кириллов калăпланă «Йытăпа Сунарçă» юмахĕ урлă чăн юлташсене шырама, суяран асăрханма вĕрентрĕç. Юмах ырă ĕçсем ытларах тума, пурнăçа юратма ăс пачĕ, граждан туйăмне те вăратма пулăшрĕ.
Вĕрентекенсен аттестаци ĕçне районти вĕренÿпе çамрăксен политикин пайĕн методисчĕ Е.Л.Карпова пысăк хак пачĕ. Уçă уроксем те, класс тулашĕнчи занятисем те ачасене воспитани парас ĕçре пысăк вырăн йышăннине пĕлтерчĕ.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии