11:57 17 октября 2015 г.
Раççей Вĕрентÿ министерстви 2014 – 2015 вĕренÿ çулĕн кăтартăвĕсем тăрăх çĕршыври чи лайăх шкулсен ячĕсене пĕлтернĕ.
Федераллă шайри экспертсен пысăк хаклавне кăçал Чăваш Республикинчи ытларах шкул тивĕçнĕ. Чăваш ен Пуçлăхĕ Михаил Игнатьев çакна республикăри вĕрентÿ тытăмĕнчи ырă улшăнусемпе çыхăнтарнă. Ку сферăна пĕрлехи бюджетăн чи пысăк пайне уйăраççĕ, вĕрентÿпе пурлăх бази пуянланать, тĕплĕ юсавсем иртеççĕ, спорт залĕсем тата площадкăсем çĕкленеççĕ. 2025 çул тĕлне республикăра 30 çĕнĕ шкул уçăлĕ.
Палăртма кăмăллă, Раççейри чи лайăх шкулсен йышĕнче Вăрнарти 1-мĕшпе 2-мĕш шкулсем те пур. Вĕсем – çĕршыври кăтартуллă ĕçлекен ялти 200 вĕрентÿ учрежденийĕсен шутĕнче.
Вăрнарти 2-мĕш шкул ТОП 200 списокне пĕлтĕр те кĕнĕччĕ. Ку – районти чи пысăк вĕренÿ учрежденийĕсенчен пĕри. Коллектива опытлă, пуçаруллă педагогсем чăмăртаннă. Ольга Валерьяновна Физер (сăнÿкерчĕкре), Татьяна Анатольевна Сапожникова, Елена Николаевна Горбунова, Тамара Александровна Алексеева, ыттисем – республикăри тĕрлĕ професси конкурсĕсен çĕнтерÿçисемпе лауреачĕсем.
Ку шкул Раççей патшалăх вĕрентÿ стандартне апробацилекен районти пĕрремĕш пилотлă шкул пулчĕ. Тытăмри инновацилле проектсене малтисен шучĕпе çул панипе пĕрлех шкул тĕрлĕ конкурссенче палăрать. Кăçал акă вăл Аслă Çĕнтерĕвĕн 70 çулхи юбилейĕ умĕн «Ачасене – Аслă Çĕнтерÿ çинчен» социаллă проектра çĕнтерчĕ. Çарпа патриотизм темиллĕ ÿкерчĕксен галерейине тивĕçнĕ районти пĕртен-пĕр шкул.
Спорта анлă çул панă. Вĕренекенсенчен чылайăшĕ футболпа, волейболпа, çăмăл атлетикăпа, ирĕклĕ кĕрешÿпе, йĕлтĕр спорчĕпе туслă. Вĕсене час-часах тĕрлĕ тĕсри ăмăртусен пьедесталĕсем çинче куратпăр.
Çарпа патриотизм воспитанийĕ çÿллĕ шайра. 2-мĕш шкул ачисем çулсеренех çамрăк армеецсен «Орленокпа» «Зарница» вăййисенче палăраççĕ.
Коллектив çитĕнекен ăрăва пахалăхлă пĕлÿ, тивĕçлĕ воспитани парассине пĕтĕм вăя хывать, пĕр тĕллевпе тăрăшать.
Сывă пурнăç йĕрки тавра калаçас пулсан, паллă педагог Иван Никифоров ятне çĕклесе пыракан Вăрнарти 1-мĕш вăтам шкул коллективĕн те спорт мухтавĕ пысăк. Çакна фойери йышлă, сумлă та чаплă Кубоксем те аван çирĕплетеççĕ.
Вĕрентÿ процесне илес пулсан, кунта та çĕнĕлĕхсем туллиех. Электронлă дневник, апатланушăн электронлă тÿлев 2-мĕш шкулти пекех кунта чи малтан пурнăçа кĕчĕç. Пуçласа пĕтĕм шкула сетьпе çыхăнтарчĕç, «Меллĕ хутлăх» программăна пĕрремĕшле пурнăçларĕç.
Ачасен пĕлÿ шайĕпе те мухтанмалли пур. Кăçал шкултан тухнă районти 31 выпускник-медалистран вуннăшĕ ку шкултан пулчĕç.
«Самый классный классный» конкурсăн республикăри ку çулхи çĕнтерÿçи кунта ĕçлет. Вăл – Наталия Самарина. Темиçе çул маларах ку ята Нина Бурмистрова та тивĕçнĕччĕ.
Ку шкулта та пултаруллă педагогсем речĕпех: Юрий Феофанов, Маргарита Буславская, Римма Павлова, Елена Ананьева, Наталья Бобина, Галина Назарова, ыттисем.
Елена Ильинична Григорьева ертсе пыракан 1-мĕш шкул та, Сергей Петрович Ильин ертсе пыракан 2-мĕш шкул та Раççейри чи лайăх шкулсен йышне пысăк ĕç кăтартăвĕсемпе, вĕренекенсен пултарулăхне пур енлĕн аталантарнипе, профильлĕ направленипе çирĕп ĕçленипе кĕнĕ. Саламлатпăр.
С.ЧИКМЯКОВА.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии