09:31 14 октября 2015 г.
«Япăх» сăмаха планеркăна хутшăннă пуçлăхсемпе ертÿçĕсем поселокра хăтлăх çуккипе, çулсем япăххипе, инфраструктура çителĕклĕ аталанманнипе çыхăнтарчĕç.
Калаçăвĕ кăçалхи тăхăр уйăхри социаллă пурнăçпа экономика аталанăвĕн малтанхи кăтартăвĕсене пĕтĕмлетнинчен çуралчĕ. Продукци туса кăларасси танлаштаруллă тапхăртинчен 32,5, промышленность производствин продукцине сутасси 28,4, вак суту-илÿ çаврăнăшĕ 6,2, обществăлла апатлану çаврăнăшĕ 1,7 процент ÿснĕ.
Районти промышленность предприятийĕсем харпăр хăй продукцине 10 млрд ытла тенкĕлĕх ăсатнă. Ку – республикăри промышленность комплексĕн пĕтĕмĕшле пайĕн 10,1 проценчĕ.
Промышленность производствине туртаканĕ – яланхиллех «Август» Фирмăн «Вăрнарти хутăш препаратсен завочĕ» филиалĕ, кăçалхи продукци калăпăшĕн 87,1 процентне кунта туса кăларнă. Предприятире шалу та чи пысăкки – 30 пин тенкĕ енне.
Пĕтĕмĕшле районти вăтам ĕç укçи 19582,1 тенкĕпе танлашнă. Ку – республикăри иккĕмĕш кăтарту.
Район администрацийĕн экономика пайĕн пуçлăхĕ Акиля Ахметова çавăн пекех социаллă пĕлтерĕшлĕ тавар хакĕсен мониторингĕпе, районта пурнăçланакан инвестици проекчĕсемпе, кĕçĕн тата вăтам предпринимательство аталанăвĕпе, муниципаллă пурлăха тытса пырассипе тата унпа хуçаланассипе, çĕр лаптăкĕсене муниципаллă харпăрлăха куçарас ыйтусемпе паллаштарчĕ.
Чăн та, кăтартусем япăх мар. Пĕлтĕрхи çула ав Вăрнар районĕнче кăна виçĕ предприяти харăс миллиардлă чикĕрен каçса вĕçленĕ. «Çав вăхăтрах, – тĕлĕнчĕç ларăва хутшăнакансем, – пирĕн тăрăх экономика енчен чухăнрах районсенчен те япăхрах аталанать...».
Район администрацийĕн пуçлăхĕн тивĕçĕсене вăхăтлăха пурнăçлакан Вячеслав Горбунов ÿпкев тĕрĕс пулнине, ку енĕпе ĕçлемеллине палăртрĕ.
Çавăн пекех вăл кун йĕркине кĕртнĕ тепĕр темăра та çивĕч ыйту пуррине каларĕ. Ку вăл – «Март» тата «Теплокомфорт» организацисен ăшă тарифĕсем самай уйрăлса тăни. Вячеслав Горбунов ку ыйтăва татса парассипе яваплă çынсене хушусем пачĕ.
Ăшă темине хускатнă май, Вăрнар хула поселенийĕн администрацийĕн пуçлăхĕ Анатолий Старовойт тунтикун тĕлне мĕнпур котельнăйсем ĕçлесе кайнине, нумай хваттерлĕ çуртсенчи кăлтăксене пĕтерме пуринче те ытларах слесарьсем тăрăшнине пĕлтерчĕ.
Ларура энергоресурссем парса тăракан предприятисем умĕнчи парăма татассипе çыхăннă ыйтăва та тишкерчĕç. Вăрнарсен ав ăшă энергийĕшĕн 13,7 млн тенкĕлĕх парăм çăмхаланнă.
Районти тĕп больницăн тĕп врачĕ Николай Тинюков пĕлтернĕ тăрăх, кĕркунне çитнĕ май, сывлав çулĕн вируслă чирĕсемпе аптăракансен шучĕ кăшт ÿснĕ. Ачасене грипран вакцинаци тăвасси вĕçленсе пырать. Аслисем валли хальлĕхе вакцинăсем килмен-ха. Çавăн пекех вăл иртнĕ эрнере Хапăсри икĕ ватă мунчара сĕрĕм тивнипе вилни çинчен пăшăрханса каларĕ.
Ку эрнекун районта Призывник кунĕ иртет. Хĕрсемпе каччăсем хушшинче волейбол турнирĕ пуçланать.
С.ЧИКМЯКОВА.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии