08:53 07 октября 2015 г.
теççĕ Вăрнарти аш-какай комбиначĕн уй-хир ăстисем
Тăвальушкăнь Ялтăра çумĕнчи кукуруза уйĕнче виççĕмĕш кун хăватлă комбайнсем мăнаçлăн ишеççĕ. Николай Тихоновпа Валерий Иванов комбайнерсем (сăнÿкерчĕкре) ир пуçласа каçченех уй-хирте тăрăшаççĕ.
Вăрнарти аш-какай комбиначĕ кукурузăна хамăр условисенче тĕшĕлĕх туса илессипе республикăра пĕрремĕш ĕçлеме пуçларĕ. Культура лаптăкĕ районта та чи пысăкки: 1000 гектар – тĕшĕлĕх, 700 гектар – выльăх апачлĕх. Кăçал вăл ăнса çитĕннĕ. Пуçĕсем – йышлă, шултра, тулли.
Алексей Федотов, Анатолий Иванов, Михаил Кузьмин, Геннадий Мордов, Вениамин Федоров водительсем кунне 6–7-шер рейс тăваççĕ. Тĕшĕленĕ кукурузăна сушилкăна турттарса тăраççĕ.
Тухăçĕ начар мар – бункер виçипе 53,3 центнер. Пĕлтĕр ку культурăн пĕтĕмĕшле пухăмĕ типĕтнĕ виçепе 3594 тоннăпа танлашнăччĕ.
Агрохолдингăн хушма хуçалăхĕнче кукурузăна выльăх апачлĕх çулассипе те ĕçсем анлă сарăлнă.
Районта ку культурăна çавăн пекех «Кольцовка» (150 га), К.Маркс ячĕллĕ (80 га), «Янгорчино» (85 га) тата «Броневик» (35 га) хуçалăхсенче лартса çитĕнтернĕ, ĕнерхи кун тĕлне (хăмăшсемсĕр пуçне) силослăх вырса пĕтернĕ.
С.ЧИКМЯКОВА.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии