08:49 05 октября 2015 г.
«Химик» спорт клубĕн 1998 – 1999 çулсенче çуралнă каччисем футбол енĕпе Чăваш Республикин первенствин çĕнтерÿçисем пулса тăнă. Çитменнине, вăл вĕçлениччен икĕ тур маларах.
Вăрнарсен командин шутĕнче 86 гол, пĕр вăййа та выляса яман, пĕр тĕлпулу никам та çĕнтерейменнипе вĕçленнĕ.
Ку команда Раççей первенствин Атăл тăрăхĕнчи турнирне виçĕ хутчен хутшăннă, Хусан первенствин çĕнтерÿçи пулнă. Ачасем опытлă тренер Александр Строганов патĕнче ăсталăха туптаççĕ.
«Химик» спорт клубĕн председателĕ Евгений Захаров çĕнтерĕве Денис Павлов, Роман Сорокин, Николай Корнилов, Дмитрий Корнилов, Максим Шадрин, Игорь Солнцев футболистсем пысăк тÿпе хывнине палăртать. Виталий Крылов – Чăваш енри вăйлă вратарьсенчен пĕри.
Командăра, тĕпрен илсен, хамăр районти ачасем, тăваттăн – Шупашкартан.
Каламалла, ку сезонра «Химикăн» пилĕк команди республикăра мала тухассишĕн тупăшать. Хальлĕхе аслисен «Химик-Август» команди пĕрремĕш, 2002 – 2003 çулсенче çуралнă ачасен команди иккĕмĕш, кĕçĕн каччăсен команди виççĕмĕш вырăнсенче пыраççĕ.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии