10:53 23 сентября 2015 г.
Вĕренÿ çулĕ пуçланнă май, районта спорт мероприятийĕсем те анлă старт илчĕç. Иртнĕ шăматкун кĕçĕн классенче вĕренекенсем нумай енлĕн кĕрешрĕç.
Ăмăртăва мĕнпур шкул тенĕ пекех хутшăннă. Чи нумай очко пухса пĕрремĕш вырăна Вăрнарти 2-мĕш шкул команди тухнă. Иккĕмĕш вырăнта – Аçăмçырминчи, виççĕмĕшĕнче – Туçи Çармăсри шкулсенче вĕренекенсем.
Уйрăмшар зачетра поселокри 2-мĕш шкулти Никита Александровăн чи нумай очко. Çĕрпелти Даниил Михайлов – кĕмĕл, Аçăмçырминчи Стас Степанов бронза призер пулса тăнă.
Тепĕр ушкăнра призерсем çаксем: Лариса Курбатова – Туçи Çармăс, Кристина Маркова – Вăрманкас тата Юля Константинова – 2-мĕш шкул.
Ку ачасенчен чылайăшĕ уйрăм тĕссенче чемпионсем пулса тăнă. Никита Александров акă 30 м чупассипе, тăршшĕне вырăнтан сикессипе. Лариса Курбатова ку дисциплинăсемсĕр пуçне 500 метра та чи хăвăрт чупса тухнă.
Уйрăм тĕссенче «ылтăн» результата çавăн пекех Наталья Михайлова (Çĕрпел), Антон Борисов (Кульцав) тивĕçнĕ.
Чăваш ен Пуçлăхĕн Кубокне çĕнсе илессишĕн шкул ачисен спартакиади йĕркипе районта футбол енĕпе «Сăран мечĕк» турнир тата район первенстви тытăннă. Шкулсем тăватă зонăна уйрăлса выляççĕ. Ăмăртусем октябрĕн 10- тата 15-мĕшĕччен пыраççĕ.
С.ЧИКМЯКОВА.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии