10:18 21 сентября 2015 г.
Уяр кунпа усă курса район аграрийĕсем вырмапа чылай ĕçлерĕç. Ĕнерхи кун тĕлне палăртнă лаптăкăн 99,2 процентĕнче ĕçе вĕçленĕ, пĕрчĕллĕ тата пăрçа йышши культурăсене 15574 гектар çинчен вырса илнĕ.
Тырпулăн пĕтĕмĕшле пухăмĕ хальлĕхе 35121 тоннăпа танлашать. Пĕрлехи вăтам тухăç – 22,6 центнер. Ку – республикăра чи лайăх кăтартусенчен пĕри.
Уйрăм хуçалăхсене илес пулсан чи пысăк тухăç çавалкассен: 31,8 центнер. Кунта ыраш 45, урпа 38, вика 37,5, пăрçа 30,3, кĕрхи тулă 23,5, çурхи тулă 30,8 центнер тухнă.
Çавăн пекех тырпул тухăçĕ «Санары», «Мураты», «Компания Агро» хуçалăхсен, Вăрнарти аш-какай комбиначĕн пысăк: 25, 3–23 центнер.
Ĕнерхи кун тĕлне ĕççине «Победа», «Броневик», «Агрохмель», «Знамя», «Юнтапа», çавăн пекех Михаил Тарасов фермер хуçалăхĕсенче çеç вĕçлемен. Вĕсенче те пухмалли лаптăксем пысăк мар. Хăш-пĕр хуçалăхсем уй-хир ылтăнне маларахах пÿлмесене кĕртсе хучĕç.
Хăмлапа ĕçлекен районти пĕртен-пĕр хуçалăхра – «Агрохмель» тулли мар яваплă обществăра – «симĕс ылтăна» татса пĕтернĕ, пухăм – 22,1 тонна, тухăçĕ – 13 центнер.
Нумай хаçалăхра халĕ çĕр ĕçченĕсем çĕрулми пуссинче пилĕк аваççĕ. Хальлĕхе ку культурăна 466 гектар çинчен пухса илнĕ. Пĕтĕмĕшле пухăм 9854 тонна. Вăтам тухăç – 211,5 центнер. «Санары» агрофирмăра, «Знамя» хуçалăхра ку кăтарту 250-па танлашать.
– Ку çулшăн, шалкăма тÿссе ирттерсе йăл илнĕ çĕрулмишĕн, начарах тесшĕн мар. Çанталăк синкерĕ тĕп тунасене чылай хуçрĕ-çке. Пăр çапнă вырăнсене микроэлементсемпе тĕллевлĕ сапрăмăр. Çакăн хыççăн çĕрулми тымарĕсем иккĕмĕш хут хăват илчĕç, ĕрчесе кайрĕç, – пĕлтерет «Санары» агрофирма ертÿçи Роберт Петров.
Калас пулать, агрофирмăра пысăк пахалăхлă сортсем çеç лартса тăваççĕ: Рокко, Импола, Фреска, Винета, Ред Фэнтези, Удача, Гало, Ред Соня... Чăтăмлă, йышлă, упранаслăхĕ пысăк вăрлăхсене кашни килограмне 70 тенкĕпе туянаççĕ. Халĕ кунта çĕрулмие сортласа ангара кĕртсе хураççĕ.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии