10:17 21 сентября 2015 г.
Чăваш Республикин патшалăх статистикин сведенийĕсем тăрăх, Вăрнар районĕ выльăх-чĕрлĕх отраслĕн чылай кăтартăвĕпе – çирĕп виççĕмĕш вырăнта.
– Ку, чи малтанах, хуçалăх ертÿçисемпе зооветспециалистсем экономикăн ансат мар условийĕсене пăхмасăр чунтан тăрăшнипе, апат пахалăхне тимлĕх уйăрнипе, рациона пăхăннипе, селекци ĕçĕпе тимленипе çыхăннă, – пĕлтерчĕ район администрацийĕн ял хуçалăхĕпе экологи пайĕн тĕп зоотехникĕ Георгий Павлович Романов.
Юлашки вăхăтра чылай хуçалăх выльăхсене тытас ĕçе çĕнĕлĕхсем кĕртрĕ. Вăрнарти аш-какай комбиначĕ ку енĕпе чи кăтартуллă ĕçлекенни. Условисем чаплă. Тинтерех илнĕ пăрусем çулталăк тăршшĕпех уйрăм «пÿртсенче» тăраççĕ. Сăвакан ĕнесене кăкарман. Залсенче массажерсем вырнаçтарнă тата ытти те. Ку пысăк хуçалăхра выльăх пуçĕ те чи йышли: ĕне-выльăх 2410 (вăл шутра сăвакан ĕнесем 1100 пуç), сыснасем 14183.
Пĕтĕмĕшле районта ку уйăх пуçламăшĕ тĕлне мăйракаллă шултра выльăх йышĕ 17076 (вăл шутран 7979 ĕне), сыснасен йышĕ 17506 пуçпа танлашать. Ытларах пайĕ – ял хуçалăх организацийĕсенче. /сĕм «Кольцовка», «Мураты», К.Маркс ячĕллĕ хуçалăхсенче, Вăрнарти аш-какай комбинатĕнче пулнă. «Знамя», «Броневик» тата «Юнтапа» хуçалăхсенче вара выльăх шутне самай чакарнă.
Сакăр уйăхри кăтартусене илес пулсан сĕт производстви пĕлтĕрхи танлаштаруллă тапхăртинчен 15,4 процент пысăкрах: 27163 тонна. Иккĕ-виççĕмĕш пайне уйрăм хуçалăхсенче туса илнĕ. Ял хуçалăх предприятийĕсенчен Вăрнарти аш-какай комбиначĕ, «Мураты», «Янгорчино», К.Маркс ячĕллĕ, çавăн пекех С.Лукина, А.Козлов тата А.Фадеев фермерсен хуçалăхĕсенче кăтартусем лайăх: 4634 – 3622 кг. Юнтапасемпе хурăнсур-çармăссен продуктивлăха ÿстерессипе ĕçлемелĕх пур, кунта вăтам сăвăм 2398 килогрампа çеç танлашнă.
Аш-какай туса илессипе тата сутассипе «Кольцовка», «Победа», «Хорнзор» кооперативсенче, Вăрнарти аш-какай комбинатĕнче кăтартусем лайăх.
Сакăр уйăхра 1950 пăру, 15794 сысна çури илнĕ. Ĕнесене пăрулаттарассипе уйрăмах К.Маркс ячĕллĕ, «Мураты» тата «Кольцовка» хуçалăхсенче аван Ĕçленĕ.
Аграрисенче выльăх апачĕ хатĕрлес ĕçсем малалла пыраççĕ. Хальлĕхе 6476 тонна утă хатĕрленĕ, 20223 тонна сенаж хывнă.
С.ЧИКМЯКОВА.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии