10:05 21 сентября 2015 г.
«Химик» стадионта пыракан строительство ĕçĕсен историлле пĕлтерĕшĕ пысăк. Кĕçех кунти пысăк футбол уйĕ искусствăлла сийпе витĕнĕ.
Хальлĕхе Шупашкарти «Стройлогистик» тулли мар яваплă общество ĕçченĕсем палăртнă лаптăка танлаштарассипе тимлеççĕ. Сергей Судаков прораб пĕлтернĕ тăрăх, хăйăртан никĕс хывма хатĕрлесе кунтан 5 пин тонна çурă çĕре тиесе тухма тивнĕ. Халĕ хăватлă КамАЗсем турттарса килекен хăйăра якатса, хытарса пыраççĕ.
Футбол уйĕ 60х105 метр йышăнать. Çавăн пекех тавралла (+10 метр) чупу çулĕсем пулĕç.
Стадион строительствине мĕнпур шайри бюджетран 35 млн та 590 пин тенкĕ уйăрнă. Искусствăлла сие пĕлтĕрех туяннă.
Республикăри районсенчен кунашкал мелпе çĕнелнĕ стадионсем Йĕпреçре тата Çĕмĕрлере кăна. Кĕçех Вăрнар футболисчĕсен те хатĕрленÿпе выляв условийĕсем лайăхланĕç.
С.ЧИКМЯКОВА.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии