08:55 15 апреля 2015 г.
Ĕнер Калинино салинчи Мăн Çавал юханшывĕ урлă хывнă вăхăтлăх кĕпере каллех хупни тĕрлĕ сас-хура кăларчĕ. «Каллех шыв татса кайнă», – терĕç çынсем.
Эрнекун, апрелĕн 11-мĕшĕнче, 2 сехет те 45 минутра çĕре çурхи шыв çĕмĕрсе кайнипе вăхăтлăх кĕперĕн пĕр пайĕ ишĕлсе аннă. Тĕп кĕпер юсавра. Чăваш Республикин транспорт тата çул-йĕр хуçалăхĕн министерствин информацийĕ тăрăх, ăна кăçалхи августра хута ямалла.
Эрнекун авари кăларса тăратнă инкеке сирсе яма май килнĕ, çынсене, техникăна явăçтарнипе юсав ĕçĕсене ирхи 7 сехет те 35 минут тĕлне вĕçленĕ. Автотранспорт çÿреме пуçланă.
– Виçĕмкун строительсем вăхăтлăх кĕпере çирĕплетме каллех çĕрĕпех, ĕнер кунĕпех ĕçлерĕç. Çавна май çула вăхăтлăха хупнă, – пĕлтерчĕ «Чăвашавтодорăн» Çĕмĕрлери ДПУ-н «Вăрнарти ДРСУ» филиалĕн ертÿçи Руслан Валерьевич Спиридонов.
Юсав ĕçĕсем вăхăтĕнче автотранспорта Аçăмçырми урлă çавăрса янă.
С.ЧИКМЯКОВА.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии