15:42 25 марта 2015 г.
«Санары» агрофирма çăмăл алăпа районти çурхи уй-хир ĕçĕсене пуçларĕ. Виçĕмкун кунта кĕрхи культурăсене апатлантарма тытăнчĕç.
Ирхи 10 сехет тĕлнелле Вăрнартан Санарпуçнелле хăпаракан çул хĕрринчи уя минераллă удобренисем хывса та пĕтерчĕç. Владимир Крипчаков тытса пыракан МТЗ-82 трактортан кăкарнă «Amazone» агрегат харăсах 32 метр анлăшне сапса пырать. Çакă та ĕç хăвăртлăхне ÿстерет. Погрузчик çинче Андрей Артемьев тăрăшать. Николай Суров удобренипе тивĕçтерсе тăрать.
Темиçе çул ĕнтĕ «Санары» агрофирма тăвайккиллĕ, шывпа çийĕнекен, япăхрах вырăнсенче культурăсене тÿрремĕн акса туса илес технологие ĕçе кĕртнĕ. Пĕлтĕр ав ку мелпе çитĕнтернĕ ыраш 54 центнер тухăç панă, кĕрхи тулă 45 центнертан кая пулман. Ыраш калчисем кăçал та лайăх хĕл каçнă. Юр кайнă лаптăксенче вăл сип-симĕс кавир пек хитрен илĕртсе выртать. Тĕммисем çăра, тунисем çирĕп.
– Хыççăнах Кивьял Хапăс çывăхĕнчи 13 гектара апатлантарма куçатпăр. Ытти уйсенче юр выртать, вĕсене техника кĕртме тăхтатпăр-ха, – пĕлтерчĕ агрофирма ертÿçи Роберт Петров.
«Санары» агрофирмăра кĕрхисем 350 гектар йышăнаççĕ. Темиçе çул тулăн «Московская – 56» сорчĕпе тухăçлă ĕçлесе пыраççĕ. Кĕркунне çавăн пекех «Московская – 39» сортăн лайăхлатнă вăрлăхне «Московская – 40» хывса хăварнă.
Хуçалăх паян тесен паян акана тухма пултарать. Пысăк пахалăхлă вăрлăха хăйсене валли те, сутлăх та çителĕклĕ хатĕрленĕ.
Планпа «Санары» агрофирмăра çавăн пекех 123 гектар нумай çул ÿсекен курăксем çине удобренисем хывмалла. Районĕпе кĕрхисене пĕтĕмпе 4281 гектар апатлантармалла.
С.ЧИКМЯКОВА.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии