11:09 24 февраля 2015 г.
«Мураты» ял хуçалăх кооперативĕн Уйкас Явăшри сĕт-çу ферминче ĕçлекенсем иртнĕ çулта кашни ĕнерен 6115 килограмм сĕт суса илнĕ, районти дояркăсем хушшинче чи малти вырăна тухнă. Сумлă ÿсĕме пĕрремĕш çĕнсе илнĕскерсем, пĕлтĕрхи çитĕнĕве кăçал тата ÿстерес тесе, фермăри выльăх-чĕрлĕх пăхакансене ăмăртăва тухма чĕнсе каларĕç.
Сĕт-çу фермин ертÿçи Владимир Павлович Петров иртнĕ çулхи ĕçсене пĕтĕмлетме, кăçалхи тĕллевсене палăртма выльăх-чĕрлĕх пăхакансене канашлăва пухрĕ.
– Хаклă ĕçтешĕмĕрсем, шутласа пăхар пĕрле, канашлар. Ферма шăпине, унăн ÿсĕмне ушкăнпа сÿтсе явни, тен, хамăр утăмсене тĕреклетме пулăшĕ. – васкамасăр, кашнин чун-чĕрине хумхантармалла каларĕ ферма ертÿçи. Пăртак сывласа илнĕ хыççăн, каллех тăсрĕ хăй сăмахне. – Халĕ хамăр мĕнле ĕçлени çинчен каласа парам: пĕлтĕр сĕт суса илессипе тухăçлă ĕçлерĕмĕр, усă куракан 100 гектар çĕр пуçне сĕт туса илессине 472,5 центнера çитертĕмĕр. Ку – 2013 çулхинчен 81,4 центнер нумайрах. Кашни ĕнерен 6115 килограмм сĕт суса илтĕмĕр. Çакă та унчченхи çулхинчен 375-шер килограмм пысăкрах. Выльăхсен шутне те ÿстертĕмĕр, мăйракаллă шултра выльăх йышне 310 пуçа çитертĕмĕр, вăл шутран сăвакан ĕнесем 88 пуç.
– Владимир Павлович, сире пÿлсех калам-ха, – сăмах илчĕ фермăри чи пултаруллă дояркăсенчен пĕри Ирина Сергеева. – Ÿсĕмсем пур, уншăн савăнатпăр, мухтанатпăр. Айтăр-ха, пĕлтĕрхи çитĕнÿсене манăçа хăварар мар, вĕсене кăçал татах ÿстерер, кашни ĕнерен çулталăкра 6200 килограмм сĕт суса илме чĕнсе калатăп сире, – унăн чĕнÿллĕ, хĕрÿллĕ сăмахĕсем тăвăллăн алă çупнипе татах та вăйланса илтĕнчĕç.
– Тĕрĕс! Маттур, Ирина! – аллисене çупа-çупа ун еннелле утрĕ выльăх апачĕ хатĕрлесе, ăна тутлăлантарса паракан Петр Краснов механизатор. – Ырă пуçарăва ырлатăп, ăна пурнăçлатпăрах, – терĕ те вăл хăйĕн ĕçĕ-хĕлĕпе паллаштарма пикенчĕ. – Апат рационне лайăхлатсах пыратпăр, кашни ĕнене куллен 4-шар килограмм комбикорм, утăпа сенажа пĕрле авăртса хатĕрленĕ хутăш, фелуцен витаминĕ, хĕвелçаврăнăш хывăхĕ, выльăх тăварĕ тата ытти усăллă апатсене те кĕртрĕмĕр, – терĕ ферма ĕçченĕ.
Юлашкинчен ферма ертÿçи В.Петров ĕçтешĕсен ырă пуçарăвне ырларĕ, вĕсене кăçал та çĕнĕ çитĕнÿсем тума ырлăх-сывлăх сунчĕ. Ферма ĕçченĕсем те хăйсен сăмахне тÿрре кăларса пыма сăмах пачĕç. Халĕ вĕсем куллен кашни ĕнерен 18,9 килограмм сĕт суса илеççĕ. Кăрлач уйăхĕнче кашни ĕнерен 559-шар килограмм сĕт сунă. Ку – районти чи пысăк кăтарту. Апла-тăк, ырă пуçару фермăра куллен вăй илсе пырать.
В.МОСКВИН.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии