Новости » Работники редакции о Послании Главы Чувашской Республики

В.НИКОЛАЕВ,

Вӑрнар районӗн «Ҫӗнтерӳ ҫулӗ» хаҫатӑн тӗп редакторӗ:

 – Республика Пуҫлӑхӗ М.Игнатьев Чӑваш Патшалӑх Канашӗ тата пӗтӗм халӑх патне тухнӑ черетлӗ Ҫырӑва тӳрремӗн итлеме хальхинче массӑллӑ информаци хатӗрӗсен ертӳҫисене те чӗнни савӑнтарчӗ. Ҫакӑ Михаил Васильевич журналистсене хисепленине яр уҫҫӑн ҫирӗплетет.

Ҫырупа тимлӗ паллашнӑ май, юлашки ҫулсенче, уйрӑмах тӑватӑ ҫул хушшинче, республика сулмаклӑ аталану ҫулӗ ҫине тӑни куҫкӗрет. Унччен ҫулсерен тенӗ пек пысӑк предприятисене панкрута кӑларса пин-пин ҫынна ӗҫсӗр тӑратса хӑварнӑ тапхӑра манман-ха. Иртнӗ ҫывӑх ҫулсенче кунашкал тӗслӗхсем пулманни савӑнтарать, вуҫех урӑхла, хӑватлӑ ҫӗнӗ предприятисем туса хута яни тӑнӑҫлӑх туйӑмӗ ҫуратать. М.Игнатьев тӑрӑшнипе республикӑра ял хуҫалӑхӗ вӑй илсе пырать. Ял ҫыннисем те патшалӑх пулӑшӑвне туйса малашлӑха шанса ӗҫлеҫҫӗ.

Республика Пуҫлӑхӗ ҫынсен шӑпине чӗре патне илни унӑн ӗҫӗсенче аван курӑнать – демографи лару-тӑрӑвӗ лайӑхланнӑран ачасене шкул ҫулӗчченхи вӗрентӳпе тивӗҫтересси пысӑк тимлӗхре. Юлашки 20 ҫул хыҫҫӑн пуҫласа ача сачӗсем хута кайма тытӑнчӗҫ. Ял ҫыннисемшӗн пирвайхи медицина пулӑшӑвӗ илесси ҫывӑхланчӗ тата ытти те.

Юлашки вӑхӑтра тӑван республика малашлӑхӗшӗн ӗҫлӗ килӗшӳсем нумай тунӑ. Вӗсенчен хӑшӗсем пурнӑҫа кӗреҫҫӗ ӗнтӗ.

Михаил Васильевич тӑван республикӑна парӑнни, вӑл унӑн ҫыннисемшӗн чунтан хыпса ҫунни кулленхи ӗҫӗнче уҫҫӑн паларать. Вӑл малашне те республикӑра пурӑнакансене пӗрле алла-аллӑн ӗҫлеме чӗнсе каларӗ. М.Игнатьев Чӑваш Ен Раҫҫейре тӗрлӗ нацисем пӗр-пӗринпе килӗштерсе пурӑнакан, туслӑ, тӑнӑҫлӑ, тараватлӑ регион ятне сыхласа хӑварассишӗн тӑрӑшни ҫырура та палӑрчӗ.

«Сарӑ хаҫатсем» юлашки вӑхӑтра республика ертӳҫисен ӗҫне варалама хӑтланаҫҫӗ пулин те, халӑхшӑн тунӑ курӑмлӑ пӗтӗм ӗҫ куҫ умӗнче.

Светлана ЧИКМЯКОВА:

Вӑрнар районӗнчи «Ҫӗнтерӳ ҫулӗ» хаҫат редакцийӗн социаллӑ ыйтусен,

вӗрентӳ тата культура пайӗн редакторӗ:

– Чӑваш ен Пуҫлӑхӗн Михаил Игнатьевӑн Чӑваш Патшалӑх Канашне янӑ черетлӗ ҫырӑвӗ паянхи тӗнчери ҫӑмӑл мар лару-тӑрура республикӑра пурӑнакансен чӗринче тӑнӑҫлӑх: шанӑҫлӑх ҫуратрех пулӗ. Вӑл тӑван Чӑваш ен аталанӑвӗпе ҫыхӑннӑ: чи кирли – ҫынсен кулленхи пурнӑҫне пырса тивекен ыйтӑвӗсене хускатрӗ. Ялсен, наци пуласлӑхӗ тӗп вырӑнта. Ҫакна республикӑра, районсенче пурнӑҫланакан ӗҫсенче куратпӑр. Михаил Игнатьев халӑха сывӑ пурнӑҫ йӗркине хӑнӑхтарас текен ыйту та ӑнсӑртран мар. Сывӑ ҫын ӗҫре те пысӑк ҫитӗнӳсем тӑвать. Иртнӗ ҫул Шупашкарта иртнӗ Пӗтӗм тӗнчери «Раҫҫей – спорт ҫӗршывӗ» спорт форумӗ республика ку енӗпе ҫине тӑрсах ӗҫленине кӑтартса пачӗ. Ун йӗркипе иртнӗ мероприятисен чаплӑлӑхне, пӗлтерӗшне, паха опытне Чӑваш ене килнӗ хӑнасем те тӗлӗнсе палӑртрӗҫ. Эппин, эпир пултаратпӑр.

Чӑваш ен Пуҫлӑхӗ ӗҫкӗ-ҫикӗне, асоциаллӑ ытти пулӑмсене хирӗҫ кӗрешме чӗнсе калани пире те, журналистсене, пырса тивет. Апла, Михаил Игнатьевӑн ҫыруне пурнӑҫласа, пирӗн те хаҫатра ҫак темӑсене ҫивӗч ҫутатмалла.

Вера УБАКОВА,

редакци ӗҫченӗ:

– Чӑваш ен Пуҫлӑхӗн Патшалӑх Канашне янӑ Ҫырӑвӗнче социаллӑ хӳтлӗхсӗр граждансен ушкӑнӗсене пулӑшу пама палӑртнине, республика укҫи-тенки шучӗпе тӑлӑх ачасен, нумай ачаллӑ ҫемьесен пурӑнмалли ҫурт-йӗр условийӗсене лайӑхлатма укҫа-тенкӗ уйӑрнине ырлатӑп. Хамӑр районти Ҫӑкаллӑ Явӑшри Петровсен, Кульцаври Ерошкинсен, Кайри Тукайри Николаевсен нумай ачаллӑ ҫемйсене пурӑнмалли капмар, илемлӗ ҫуртсем туса панӑшӑн чӗререн савӑнатӑп. Михаил Игнатьев хӑйӗн ҫырӑвӗнче ҫак программа малашне те ӗҫлессине пӗлтерчӗ.

Оксана СЕМЕНОВА:

«Ҫӗнтерӳ ҫулӗ» хаҫат редакцийӗн реклама пайӗн редакторӗ:

–Республика Пуҫлӑхӗ черетлӗ Ҫыравӗнче халӑха хумхантаракан чылай ыйтӑва сӳтсе яврӗ. Мана уйрӑмах ялта пурӑнакансен пурнӑҫ условийӗсене лайӑхлатма майсем туса парассине тимлӗх уйӑрни кӑмӑла кайрӗ. Акӑ 2015 ҫултан пуҫласа ял ҫӗрӗнчи халӑх пурӑнакан вырӑнсенче куҫӑмлӑ сийлӗ автомобиль ҫулӗсем тума пуҫлӗҫ. Ҫавӑн пекех ялти культура ҫурчӗсене тӗпрен юсаса ҫӗнетмелли программӑна та ырлатӑп. Ялсенче культура вучахӗ сӳнмесен ялӑн малашлӑхӗ пур тесе шутлатӑп.