15:46 25 февраля 2014 г.
Нарăс уйăхĕн 20–21-мĕшĕсенче Шупашкарти Николаев космонавт урамĕнчи ял хуçалăх пасарĕнче «Çĕр улми – 2014» курав ĕçленĕ. Улттăмĕш хут йĕркеленĕ форум кăçал та тĕнче шайĕнче иртнĕ.
Курава Чăваш ен Пуçлăхĕ Михаил Игнатьев уçнă, вăл пысăк пĕлтерĕшлĕ пулнине палăртнă. Республика Пуçлăхĕ Раççей ял хуçалăх академийĕн А.Г.Лорх ячĕллĕ çĕр улми хуçалăхĕн Пĕтĕм Раççейри ăслăлăх-тĕпчев институчĕн директорне Евгений Симакова курава çулленех хутшăнма май тупнăшăн тав тунă. Институт çĕр улми производствин технологине çĕнетсех пырать, лайăх тухăç паракан эффективлă çĕнĕ сортсем кăларать.
Михаил Игнатьев курав экспозицийĕпе паллашнă, павильонсен умĕнче чарăна-чарăна тăнă. Малта пыракан технологисене пурнăçа хăюллăн кĕртекенсем, ÿсен-тăрана чир-чĕртен, сăтăрçăсенчен хÿтĕлекен тавар туса кăларакансем, паха вăрлăх çитĕнтерекенсем хăйсен таварĕпе паллаштаракан вырăнсене çитсе курнă.
Конференц-залра «Çĕр улмин хальхи вăхăтри пĕлтерĕшĕ тата пуласлăхĕ» ятпа ăслăлăх-практика конференцийĕ иртнĕ. Малтан ЧР ял хуçалăх министрĕ Сергей Павлов тăван республикăра «иккĕмĕш çăкăр” туса илесси хăш шая çитнипе паллаштарнă, ăна ку чухне тухăçлă çитĕнтерме майсем пуррине хăш-пĕр тĕслĕхпе çирĕплетнĕ.
«Пирĕн тивĕç – халăх сывлăхĕшĕн тăрăшасси, – тенĕ Евгений Симаков. – Çавăнпа селекци енĕпе çине тăрсах ĕçлемелле, паха сортсем кăлармалла, тирпейлекен промышленноçа аталантармалла».
Константин Пшеченков профессор Мускав облаçĕнчи «Озеры» ООО аталанăвĕпе паллаштарнă май çуса сутакан çĕр улмин кашни килограмĕ çуманнинчен хуçалăха 18–20 тенкĕ таса тупăш панине çирĕплетнĕ.
Уява пухăннисем ăсталăх класĕсемпе «çавра сĕтелсенче» пĕр-пĕрин опычĕпе паллашнă, çĕнĕ пĕлÿпе пуянланнă.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии