15:43 25 февраля 2014 г.
Тăван çĕр-шыв хÿтĕлевçин кунĕ умĕн Чăваш Республикин Пуçлăхĕ Михаил Игнатьев Правительство çуртĕнче чăваш офицерĕсен Мускаври «Тăван çĕр-шыв ывăлĕсем» пĕрлĕхĕн йышлă делегацине йышăннă. Кашни – истори, легендарлă çын, чăн-чăн арçын тĕслĕхĕ. Урăхла калаймăн. Кашнин кăкăрĕ çинче – орден-медаль речĕсем. Делегаци йышĕнче хамăрăн мухтавлă ентешсем те – Катăшра çуралса ÿснĕ Михаил Григорьев генерал-майор тата Валерий Федоров контр-адмирал (Услапа Нурăсран) – пулнă.
Чăваш ен Пуçлăхĕ йышăниччен тăван республикăмăрăн мухтавлă ывăлĕсем Шупашкарти вĕренÿ заведенийĕсенче, кадет класĕсенче вĕренекенсемпе тĕл пулусем йĕркеленĕ, Паттăрлăх урокĕсем ирттернĕ, пĕтĕм халăх пĕр тĕллевпе пĕтĕçсе хăватлă тăшмана çапса аркатнă, Совет Союзĕн тата Раççейĕн Хĕç-пăшаллă вăйĕсен историйĕ çинчен тĕплĕ каласа кăтартнă. Шупашкарта кăна мар, районсенче те патриот воспитанийĕ парассине çÿллĕ шайра туса пынипе кăмăллă юлнине пĕлтернĕ республика ертÿлĕхне, уншăн чунран тав тунă.
Тĕл пулăва хутшăннисене Чăваш Республикин Патшалăх Канашĕн Председателĕ Юрий Попов, Чăваш ен Пуçлăхĕн Администрацийĕн ертÿçи Александр Иванов, республикăри çар комиссарĕ Александр Мокрушин полковник тата Шупашкар хула пуçлăхĕ Леонид Черкесов Чăваш енре çар тата патриот воспитани ĕçне мĕнле йĕркеленипе, унти çитĕнÿсемпе тĕплĕ паллаштарнă.
Михаил Васильевич ентеш-генералсене тăван тăрăха ялан асра тытнăшăн, кунта килсех çÿренĕшĕн, çыхăнăва татманшăн, çитĕнекен ăрăва хăйсен тĕслĕхĕпе патриот воспитанийĕ пама пулăшнăшăн тав тунă. Çĕр-шыв хÿтĕлевçин уявĕпе чунтан саламланă, çирĕп сывлăх, тăнăç пурнăç суннă.
«Тăван çĕр-шывăн ывăлĕсем» офицерсен юлташлăхĕн ертÿçи Владислав Ильин вице-адмирал Михаил Игнатьевпа Чăваш ен Пуçлăхĕн Администрацийĕн ертÿçине Александр Иванова «СССР космонавт летчикĕ А.Г.Николаев» медальпе наградăланă.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии