15:42 25 февраля 2014 г.
Сочири Олимпиадăн юлашки кунĕсенче Раççей спортсменĕсем уйрăмах хытă савăнтарчĕç, çитĕнÿсен енчĕкне сумлă медальсем кÿчĕç. Çапла Раççейĕн пĕрлештернĕ команди 33 награда (13 ылтăн, 11 кĕмĕл, 9 бронза) çĕнсе илсе пĕтĕмлетÿллĕ медаль таблицин чи çÿллĕ йĕркине йышăнчĕ.
Эрне кун Раççейĕн икĕ ылтăн, пĕр кĕмĕл хушăнчĕ. Чи пысăк наградăсене шорт-трекра Виктор Ан уйрăм зачетра, 500 метрта, тата командăпа – Виктор Ан, Владимир Григорьев, Семен Елистратов, Руслан Захаров – 5000 метрта çĕнсе илчĕç. Хĕрсем биатлонра, эстафетăра, иккĕмĕш пулчĕç: Ольга Вилухина, Екатерина Шумилова, Ольга Зайцева тата Яна Романова.
Шăмат кун, февралĕн 22-мĕшĕнче, сноубордра, йĕлтĕрпе чупассипе, биатлонра, ту йĕлтĕр тата коньки спорчĕсенче медальсен çичĕ комплектне выляттарчĕç. Сноубордра (паралельлĕ слалом) Вик Уайлд иккĕмĕш хутчен Олимп чемпионĕ пулса тăчĕ. Конькипе командăпа ăмăртса чупассипе Раççей хĕрĕсен команди бронзăна тивĕçрĕ: Ольга Граф, Екатерина Шихова, Екатерина Лобышева тата Юлия Скокова. Биатлонра (эстафета, 4х7,5 км) Алексей Волков, Евгений Устюгов, Дмитрий Малышко тата Антон Шипулин 1988 çулхи Олимпиада хыççăн арçынсем хушшинче этафетăра пĕрремĕш хут ылтăн çĕнсе илчĕç.
Раççей йĕлтĕрçисем Олимпиадăн финал кунĕнче те хытах тĕлĕнтерчĕç. 50 километрлă масс-стартра пьедестала пĕтĕмпех пирĕн спортсменсем йышăнчĕç. Чи пысăк пробăллă медале Александр Легков тивĕçрĕ. Максим Вылегжанин – иккĕмĕш, Илья Черноусов виççĕмĕш пусма çине хăпарчĕç.
Бобслейра Александр Зубковăн экипажĕ мала тухасси пирки никам та иккĕленмерĕ, вăхăт кăтартăвĕ унăн кашни хутĕнчех чи лайăххи пулчĕ. Çапла Александр Зубков, Алексей Негодайло, Дмитрий Труненков тата Алексей Воевода пĕрлехи çитĕнÿсен енчĕкне кÿнĕ 13-мĕш ылтăнпа Раççей командин лидер вырăнне хытах çирĕплетрĕ. Шел те, Александр Касьянов экипажĕ виççĕмĕш вырăна 0,03 çеккунт выляса ячĕ, тăваттăмĕш пулчĕ.
Сочири Хĕллехи XXII Олимп вăййисем вĕçленчĕç. Раççейĕн пĕрлештернĕ команди вĕсенче медальсен пĕтĕмĕшле шучĕпе те, ылтăн наградăсен шучĕпе те рекорд çапрĕ. Пирĕн вара хамăрăн спортсменсемпе мăнаçланмалли, мухтанмалли, вĕсене тĕслĕх вырăнне хурса хакламалли кăна юлать.
С.ЧИКМЯКОВА.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии