10:29 24 февраля 2014 г.
Сочири XXII Хĕллехи Олимп вăййисем тата XI Паралимп вăййисем вăхăтĕнче хăнасене пысăк çĕр-шывăн пĕрлĕхне, унăн иксĕлми пуянлăхне тата тĕрлĕ енлĕ çут çанталăк ландшафчĕсене, Раççейре пурăнакан халăхсен тĕлĕнмелле культурипе йăли-йĕркисене кăтартас тĕллевпе Олимп паркĕнче мартăн 16-мĕшĕччен «Раççей регионĕсен (федераллă округĕсен) экспозицийĕ» проект ĕçлет. Мероприятие Раççей Правительствипе Президент Администрацийĕ йĕркеленĕ. Кашни федераллă округăн курав лаптăкĕ 560 тăваткал метрпа танлашать. Пĕрлехи слоган: «Раççей – Мăнаçлă, Çĕнĕ, Уçă».
Проект йĕркипе Атăлçи федераци округĕн пĕрлехи курав экспозицине йĕркеленĕ. Чăваш Республики те комплекслă стенд йышĕпе 11 тематикăллă видеопрезентацие пăхма сĕнет. Вĕсем республика тăрăх виртуаллă экскурсие тухма, культура пуянлăхĕпе, спорт çитĕнĕвĕсемпе, экономика аталанăвĕпе, инвестици илĕртÿлĕхĕпе, регионăн туризм потенциалĕпе паллашма, çавăн пекех инвесторсене республикăн конкурентлă ырă енĕсене пĕлме май параççĕ.
Экспозицие килекенсене «Чăваш Республикине ырă сунса кĕтетпĕр», «Шупашкара ырă сунса кĕтетпĕр», «Чăваш енре физкультурăпа спорт енĕпе ĕç тăвакан влаç органне туса хунăранпа 90 çул», «Спортпа туслă Чăваш ен – аваллăхран малашлăха» видеофильмсем тата «Чăваш Республики – хутшăнса ĕçлеме чĕнетпĕр» тата ытти слайд-шоу кĕтсе илеççĕ. Вĕсемсĕр пуçне Чăваш ен культурипе Чăваш патшалăх филармонийĕн «Çавал» фольклорпа эстрада ансамблĕ паллаштарать.
Паркра пулакансене пирĕн регион çинчен парнеленĕ республика символикиллĕ сувенирсем, буклетсемпе кĕнекесем аса илтерсе пурăнĕç.
Курав уçăлнăранпа республика экспозицийĕпе 15 пин ытла çын паллашнă. Унта Раççей Президенчĕн Атăлçи федераци округĕнчи полномочнăй представителĕн заместителĕ Галина Изотова та çитсе курнă. Вăл курава пысăк хак панă, экспозици хăйĕн кăсăклăхĕпе Олимп вăййисен хăнисен пысăк пайне явăçтарма пултарнине палăртнă.
Февралĕн 15-мĕшĕнче Раççей регионĕсен экспозицийĕпе Владимир Путин та паллашнă. Курав вăхăтĕнче вăл ачасемпе çамрăксен спортне аталантарассипе калаçу пуçарнă.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии