10:27 24 февраля 2014 г.
Ытлари кун – кĕçнерни кун Сочири XXII Хĕллехи Олимп вăййисенче Раççей спортсменĕсен çитĕнÿсен енчĕкĕ тата пилĕк медальпе – икĕ ылтăнпа, икĕ кĕмĕлпе тата пĕр бронзăпа пуянланчĕ.
Ытлари кун, 11-мĕш ăмăрту кунĕнче, тата тепĕр çичĕ тĕсре чемпионсем палăрчĕç: биатлонра, конькипе чупассипе, йĕлтĕрпе икĕ енлĕ кĕрешÿре, сноубордра, фристайлра, ту йĕлтĕр спортĕнче тата шорт-трекра (хĕрарăмсем). Раççей спортсменĕсенчен Николай Олюнин палăрчĕ, сноуборд-кросра вăл кĕмĕл медале тивĕçрĕ.
Юн кун наградăсем хăйсен геройĕсене çак тĕссенче тупрĕç: биатлонра, бобслейра, ту йĕлтĕр спортĕнче, конькипе чупассипе, йĕлтĕрпе ăмăртассипе тата сноубордра. Çак кун Олимпиада ылтăнне Раççее сноубордра экс-американец Виктор Уайлд парнелерĕ. Унăн мăшăрĕ Алена Заварзина ку тĕсрех командăна бронза кÿчĕ. Никита Крюковпа Максим Вылегжанин йĕлтĕрпе командăпа спринтра кĕмĕл çĕнсе илчĕç. Шел те, Раççей хоккеисчĕсем финалăн пĕрре- тăваттăмĕш пайĕнчи тĕл пулура финсене 1:3 шутпа выляса ячĕç.
Виçĕм кунхи ăмăрту кунĕ Раççей çыннисемшĕн савăнăçлă вĕçленчĕ. Конькипе фигурăсем туса ярăнассипе пирĕн тата тепĕр ылтăн хушăнчĕ. Хальхинче Олимпиадăн çĕнтерÿ пьедесталĕн чи çÿллĕ пусми çине совет тата Раççей историйĕнче пĕччен ăмăртакансем хушшинче пĕрремĕш хут Аделина Сотникова тăма тивĕçрĕ. Раççейĕн тепĕр фигуристки – командăна çĕнтерÿ кÿнĕ Юлия Липницкая, шел те, уйрăм зачетра призерсен йышне лекеймерĕ, пĕтĕмлетÿ таблицин пиллĕкмĕш йĕркине йышăнчĕ. Кĕçнерни кун ытти тĕссенче медальсем пулмарĕç.
Ĕнерхи кун тĕлне Раççей командин 23 медаль: çичĕ ылтăн, тăхăр кĕмĕл тата çичĕ бронза. Вăл тăваттăмĕш вырăнта.
С.ЧИКМЯКОВА.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии