15:10 18 февраля 2014 г.
Кану кунĕсем Шĕнер Ишекре шавлăн та хаваслăн иртрĕç. Яла Олимп çулăмĕн факелĕ килсе çитрĕ. Çак пĕлтерĕшлĕ саманта халалласа Шĕнер Ишек ялĕнчи йĕлтĕрçĕсем 50 çын енне вăрман хĕрне пуçтарăнчĕç. Шкул ачисем те, ялти çамрăксем те, аслăрах çулхисем те – пурте савăнăçлă, шÿтлеççĕ, кулаççĕ. Лупаславар урамĕ шăв-шавпа тулчĕ.
Ял поселени администрацийĕн пуçлăхĕ В.Романов пурне те спортпа туслашма чĕнчĕ, Сочи хулинчи Олимпиада хыпарĕсемпе паллаштарчĕ. Кашни йĕлтĕрçĕ валли асăнмалăх парне, грамотăсем хатĕрленĕ вăл.
Кĕçех йĕлтĕрçĕсем карталанса пĕр-пĕрин хыççăн малалла ыткăнчĕç. Дистанци кĕскех мар пулин те, пурте финиша чи лайăх кăмăлпа чупса тухрĕç. Çакăн пек мероприятисене ирттерме хастар пулăшакансене тав сăмахĕ калас килет. Акă, Любовь Убакова тивĕçлĕ канура пулин те пушă вăхăт тупăнсанах йĕлтĕр çине тăрса тÿрех вăрман еннелле вĕçтерет.
Йĕлтĕрçĕсен тренерĕ вара – Вăрнарти «Сельхозэнерго» предприятин тĕп инженерĕ – Анатолий Васильев. Вăл яланах ял çыннисемпе пĕрле. Валерий Григорьев нумай пулăшать, ăмăртуçăсене парнесемпе хавхалантарать.
Антонина КРАСНОВА.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии