15:08 18 февраля 2014 г.
Çĕн Сăрьел хĕрачи Лариса Зайцева, çĕршывăн тĕп хулинче олимп резервисен училищинче вĕренекенскер, Мускав хулишĕн Сыктывкарта йĕлтĕрпе чупассипе иртнĕ Раççей первенствине хутшăннă. Спринтра вун пилĕк çулхи хĕрача вун тăваттăмĕш пулнă. Эстафетăра вара – пĕрремĕш. Лариса пĕрремĕш тапхăрпа чупнă, командăна тÿрех малти вырăна кăларнă.
Унăн йĕкĕреш йăмăкĕсем те канмалли кунсенче район чысне тивĕçлĕн хÿтĕлерĕç. Йĕлтĕр чупăвĕпе Шупашкарта иртнĕ Чăваш ен чемпионатĕнче классика стилĕпе виçĕ километра Лена пĕрремĕш результатпа вĕçленĕ, Зоя – иккĕмĕш. Владимир Кузьмин патĕнче ăсталăха туптакан, пирĕн районшăн чупакан Дарья Титова виççĕмĕш вырăн йышăннă. Тренерăн мăшăрĕ Наталья Кузьмина тăваттăмĕш, Екатерина Лукина пиллĕкмĕш, Александр Романов улттăмĕш пулнă.
Иккĕмĕш кунне ирĕклĕ стильпе Лена Зайцева виçĕ километрта бронза призер пулса тăнă. Зоя финиша тăваттăмĕш çитнĕ. Çĕрпелти Данил Сергеев пиллĕкмĕш вырăн йышăннă.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии