14:46 18 февраля 2014 г.
Йăлана кĕнĕ тăрăх, пушар хуралĕн ĕçченĕсем ачасем хушшинче пултарулăх конкурсне ирттерессине хыпарлаççĕ. Яланхиллех ăна хăйсен професси уявне халалланă, кăтартусене те çак вăхăталла пĕтĕмлетĕç.
Конкурсăн районти тапхăрне йĕркелекенсем – ВДПО-н Вăрнарти вырăнти уйрăмĕ, Вăрнарти 27-мĕш пушар чаçĕ, асăрхав ĕçĕ-хĕлĕн районти уйрăмĕ тата район администрацийĕн вĕрентÿпе çамрăксен политикин пайĕ.
Ытти çулсенчи пекех шкул ачисем хăйсен ал ĕçĕсене виçĕ номинацие – ÿкерÿ ăсталăхĕ, декораципе прикладной искусство, пултарулăхăн техника тĕсĕсем енĕпе – тăратма пултараççĕ.
Конкурса хутшăнакансене виçĕ ушкăнпа пайланă: 6–10 çултисем, 11–14 çултисем тата 15–18 çултисем. Шкул çулне çитейменнисем тата ятарлă вĕренÿ учрежденийĕсенче пĕлÿ пухакансем уйрăм ушкăнсенче ăмăртаççĕ. Ал ĕçĕсене хăть мĕнле мелпе тата материалпа ÿкерме-ăсталама, вĕсене сăвă-каларăшсемпе, ваттисен сăмахĕсемпе илемлетме юрать – интереслĕ шухăшсене пурнăçа кĕртме нимле чару та çук.
Апла пулин те пултарулăх ĕçĕсен пурин те пĕр тĕллеве пĕрлештермелле: пушар хăрушсăрлăх правилисене çутатмалла е вут-çулăм сиенне кăтартмалла.
Конкурса хутшăнас кăмăллисене ВДПО-н Вăрнарти вырăнти уйрăмĕнче (Вăрнар поселокĕ, Ленин урамĕ, 134-мĕш çурт) кĕтеççĕ, ĕçсене мартăн 26-мĕшĕччен йышăнаççĕ. Ыйтса пĕлмелли телефон 2-50-32.
И.ЯКОВЛЕВА.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии