14:26 18 февраля 2014 г.
Сочири Хĕллехи Олимп вăййисене телевиденипе тÿрĕ трансляцисене куç илмесĕр пăхатпăр. Çак кунсенче Раççей спортсменĕсем вăл е ку тĕсре Олимпиада историнче пуçласа медальсем çĕнсе илчĕç.
Кунашкал пулăм Олимпиадăн 7-мĕш ăмăрту кунĕнче, февралĕн 14-мĕшĕнче, те пулса иртрĕ. Скелетонра Елена Никитиначчен халиччен Раççейрен никам та медаль илеймен. Вăл вара çĕр-шыв командин çитĕнÿсен енчĕкне «бронза» кÿчĕ.
Çак кун ытти тĕссенче – фристайлра, конькипе фигурăсем туса ярăнассинче, йĕлтĕр чупăвĕнче, ту йĕлтĕр спортĕнче, биатлонра – Раççей спортсменĕсенчен палăракан пулмарĕ.
Февралĕн 15-мĕшĕнче 88 çĕр-шыври спортсменсем çичĕ комплект медальшĕн кĕрешрĕç. Пирĕн енчĕк çак кун виçĕ медальпе пуянланчĕ. Вĕсенчен иккĕшĕ – ылтăн. Пĕрне шорт-трекра, 1000 метрта, Виктор Ан, теприне скелетонра Александр Третьяков çĕнсе илчĕç. Виççĕмĕш медалĕ – кĕмĕл: шорт-трекра ăна Владимир Григорьев тивĕçрĕ.
Вырсарни кун, Олимпиадăн 9-мĕш ăмăрту кунĕнче, пилĕк комплект медаль выляттармаллаччĕ. Анчах та тĕтре карса илнипе арçынсем биатлонра ăмăртаймарĕç, масс-старта малтан сехетшер, кайран тунти куна, унтан çанталăк улшăнманнине кура ытлари куна куçарчĕç.
Сноубордра пирĕн хĕрарăмсенчен медальшĕн кĕрешекен пулмарĕ. Конькипе хăвăрт чупассипе Раççей хĕрĕсенчен чи лайăх результат Юлия Скокован – пиллĕкмĕш.
Чи кăмăлли йĕлтĕр эстафети пулчĕ. Пирĕн спортсменсем – Дмитрий Япаров, Александр Бессмертных, Александр Легков, Максим Вылегжанин – кĕмĕл призерсем.
Виçĕм кун Раççей бобслеисчĕсем Александр Зубковпа Алексей Воевода историре пĕрремĕш хут Олимп чемпионĕсем пулса тăчĕç. Конькипе фигурăсем туса ярăнассипе ташăра Раççей мăшăрĕсенчен Елена Ильиныхпа Никита Кацалапов пĕтĕмлетÿллĕ таблицăн виççĕмĕш йĕркине йышăнчĕç.
Шел те, биатлонра масс-стартра Раççей хĕрĕсенчен нихăшĕ те шанăçа тÿрре кăлараймарĕç. Фристайлра та, трамплинран йĕлтĕрпе сикессипе те, сноуборд-кроссра та медальсем çук.
Çапах та Зубковпа Воеводăн ылтăн медалĕ Раççейĕн пĕрлештернĕ командине медаль зачетĕнче иккĕмĕш вырăна çĕклерĕ. Ĕнерхи кун тĕлне пирĕн 18 медаль: пилĕк ылтăн, çичĕ кĕмĕл, ултă бронза.
С.ЧИКМЯКОВА.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии