16:12 14 февраля 2014 г.
Пуçаруллă, ăслă, хастар – çакăн пек хаклаççĕ Вăрнарти ял хуçалăх техникумĕнче Максим Павлова ĕçтешĕсем. Преподавательте икĕ çул ытла кăна тимлет пулин те профессилле вĕрентĕве аталантарассине вăл сахал мар тÿпе хывать.
Вĕрентÿ учрежденийĕсене паян шăпах çакăн пек çĕнĕ варкăш кÿрекен çамрăксем кирлĕ – хăй те анлă тавра курăмлă, студентсене те пĕлÿ тĕнчине илĕртме пĕлет.
Производство вĕрентĕвĕн мастерĕ тата ятарлă дисциплинăсен преподавателĕ патшалăхăн вĕрентÿри çĕнĕ стандарчĕсене пурнăçа кĕртессипе пысăк ĕç тăвать. «Утарçă» професси енĕпе вăл хатĕрленĕ вĕрентÿ программи кунта анлă пурнăçа кĕрет.
Теори кăна çителĕксĕр, вĕренекенсен шутлама та пĕлмелле, тет вăл. Çавăнпах-тăр, ун студенчĕсем тăтăшах тĕпчев ĕçĕсем çырса пиçĕхеççĕ. Çамрăк преподаватель ертсе пынипе ачасем пыл хурчĕсен çемйисене хĕл каçарассин пахалăхне ÿстерессипе опытпа эксперимент ĕçĕ ирттереççĕ. Ун результачĕсемпе тĕрлĕ шайри наукăпа практика конференцийĕсене хутшăнаççĕ. 2012 çулта А.Григорьева, пĕлтĕр С.Яковлев регионсем хушшинчи «Юность Большой Волги» конференци-фестивалĕн лауреачĕсем пулса тăнă.
Педагог-профессионалăн опычĕпе ытти вĕрентÿ учрежденийĕсенче те кăсăкланаççĕ. Виçĕм çул вăл республикăри «Профессионал года–2012» педагогика ăсталăхĕн конкурсне хастар хутшăннă. Пĕлтĕр хăйĕн ĕçĕпе педагогика идейисен республикăри фестивалĕнче паллаштарнă.
Çамрăксене воспитани парас тĕлĕшпе нумай тимлет. Ку енĕпе вăл класс тулашĕнчи мероприятисем, конкурссем, предмет эрнисем йĕркелет, «Утарçă» олимпиади валли хăй хатĕрленĕ методика материалĕсене тĕпе хывса ĕçлет.
Чăваш ен Пуçлăхĕн стипендиачĕ Максим Павлов – Вăрнар каччи. Çемьеллĕ, мăшăрĕпе икĕ ача çитĕнтереççĕ.
С.ЧИКМЯКОВА.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии