15:21 14 февраля 2014 г.
Сочири Хĕллехи Олимп вăййисем хĕрсех пыраççĕ. Раççей спортсменĕсемшĕн эпир аякран, телетрансляци урлă кăна «чирлетпĕр» пулин те, вĕсен çитĕнĕвĕсемшĕн чунтан савăнатпăр, ăнăçсăр саманчĕсемшĕн хурланатпăр.
Тунти кун, февралĕн 10-мĕшĕнче, Раççей спортсменĕсен çитĕнĕвĕсен енчĕкĕ икĕ бронза медальпе пуянланчĕ. Вĕсене Виктор Ан шорт-трекра 1500 метрта, Александр Смышляев могулта (фристайл) çĕнсе илчĕç.
Олимп вăййисен тăваттăмĕш кунĕнче, февралĕн 11-мĕшĕнче, спортсменсем сакăр комплект медальшĕн тупăшрĕç. Çак кун командăна Ольга Фаткулина кĕмĕл медаль кÿчĕ – коньки спортĕнче 500 метра вăл иккĕмĕш результатпа вĕçлерĕ. Шел те, биатлонра (хĕрарăмсем, хăваласа чупасси), йĕлтĕр чупăвĕнче (хĕрарăмсем, спринт), фристайлра, сноубордра, трамплинтан йĕлтĕрпе сикессипе (хĕрарăмсем), çуна спортĕнче (хĕрарăмсем), ски-слоупстайлра (хĕрарăмсем) ытти çĕр-шывсен çĕнтерĕвне пăхса килентĕмĕр.
Февралĕн 12-мĕшĕнче медальсен ултă комплектне выляттарчĕç. Ту йĕлтĕр спортĕнче (хĕрарăмсем), конькипе чупассипе (1000 м, арçынсем), икĕ енлĕ йĕлтĕр тупăшăвĕнче (вăтам трамплин, арçынсем), çуна спортĕнче (мăшăр), сноубордра (хĕрарăмсем) ытти çĕр-шыв спортсменĕсем вăйлăрах пулчĕç. Конькипе фигурăсем туса ярăнассипе вара Раççей мăшăрĕсене çитекен пулмарĕ. Çĕнтерÿ пьедесталĕ çине харăсах икĕ мăшăр тăма тивĕçрĕ: Татьяна Волосожарпа Максим Транькин – чи çÿлти пусми çине, Ксения Столбовапа Федор Климов – иккĕмĕшне.
Февралĕн 13-мĕшĕнче ултă тĕсре медальсем выляттарчĕç: арçынсем фристайлра тупăшрĕç, хĕрарăмсем классика стилĕпе 10 километра йĕлтĕрпе чупрĕç, шорт-трекра (500 м), конькипе чупса (1000 м) ăмăртрĕç – кусенче, шел те, Раççей спортсменĕсене ăнăçмарĕ.
Çитĕнÿ кÿрекенĕсем çуна спорчĕн ăстисем – Татьяна Иванова, Альберт Демченко, Александр Денисьев, Владислав Антонов. Эстафетăра вĕсем кĕмĕл медаль çĕнсе илчĕç.
Биатлонра та медаль хушăнчĕ. 20 километра Евгений Гараничев виççĕмĕш результатпа вĕçлерĕ.
Çак кун Раççейшĕн пĕлтершлĕ хоккей матчĕ пулчĕ. Пирĕн спортсменсем Словение 5:2 шутпа çĕнтерчĕç.
Паллах, кĕçнерни кунхи пăшăрхануллă саманта асăнмасăр иртме çук. Конькипе фигурăсем туса ярăнассипе Евгений Плющенко пысăк шанăç парасса шаннăччĕ. Шел те, шăм-шака çемĕçтерме тухсан суран илнипе вăл хăйне программăран кăларма ыйтрĕ.
Ăмăртусем малалла пыраççĕ. Ĕнерхи кун тĕлне Раççей команди медальсем шучĕпе çиччĕмĕш вырăнта. Унăн 2 ылтăн, 5 кĕмĕл, 4 бронза медаль.
С.ЧИКМЯКОВА.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии