14:24 12 февраля 2014 г.
Раççейре XXII Хĕллехи Олимпиада пырать. Çак кунсенче Сочи хули пĕтĕм тĕнчери чи вăйлă атлетсене пухрĕ. Вĕсен хĕрÿ кĕрешĕвне эпир телевизорпа сăнатпăр, хамăр спортсменсем çĕнтерсен савăнатпăр, выляса ярсан – хурланатпăр.
Тăванăмăрсем, атьăр Олимпиадăна хутшăнакан Раççей спортсменĕсене вăй кӳрес, пулăшас тĕллевпе хамăрăн чăваш Улыпиадине ирттерер! Пĕр енчен – эпир Олимпиадăна хутшăнакансемпе пĕр шухăшлă пулнине кăтартăпăр. Олимп юхăмĕ, хăйĕн ырă тĕслĕхĕпе хавхалантарса, çĕр чăмăрĕ çинче пурăнакансене пурне те савăнăç кÿрет-çке! Тепĕр енчен – хамăр сывлăхшăн усăллă ĕç тăвăпăр, ача-пăчана та сывă пурнăç йĕркине хăнăхтарăпăр. Улыпиада ирттерме укçа-тенкĕ те кирлĕ мар, хавхалану çеç пултӑр.
Февралӗн 15-мӗшӗнче, Тӑвай районӗнчи Енӗш Нӑрваш ялӗнче «Улыпиада» ятпа спорт уявӗ иртмелле. Чăваш наци конгресӗпе Чăваш наци телерадиокомпанийӗ сире пурне те 11 сехетре, «Улыпиада» уҫăлнӑ самантра, пӗр сехетлӗх те пулин вӑхӑт тупса урама тухма чĕнеççĕ. Кам çунашкапа, кам йӗлтӗрпе, кам конькипе, кам таканккапа, кам юр чăмаккипе перкелешме çеç тухӗ – уйрӑмлӑхӗ çук. Чи кирли – çак самантра эпир пурте – Улӑп йӑхӗнчен тухнӑ пӗтӗм чӑваш! – сывӑ пурнӑç йӗркишӗн кар тӑрӑпӑр, хамӑр çӗршыв спортсменӗсемпе пӗрле пулнине уççӑн палӑртӑпӑр!
Сӑн ӳкерчӗксемпе видео ӳкерчӗксене Конгресӑн электрон адресӗпе (congress21@mailĕru) ярса е хӑвӑр тӗллӗн Конгресс çуртне (Шупашкар хули, Воробьев композиторсен урамĕ, 10) кӗртсе пама пултаратӑр, кайран вара вӗсене Чăваш наци телевиденийӗпе кӑтартӑпӑр.
Атьӑр пурте чӑваш Улыпиадине!
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии