09:55 12 февраля 2014 г.
Юлашки вăхăтра пĕтĕм çĕр-шыв Олимп вăййисен юхăмĕпе пурăнать. ЧР Сывлăх сыхлавĕпе социаллă аталану министерстви пуçарнипе йĕркеленĕ хĕллехи спорт фестивалĕ те шăпах çак спорт уявĕ ячĕпе иртнĕ. Унта республикăри психикăпа неврологи интерначĕсенче сипленекенсем хăйсем хушшинче чи хăвăрттисене тата маттуррисене палăртнă.
Ăмăртусем калининăсемшĕн уйрăмах ăнăçлă пулнă: вĕсем икĕ çул иртнĕ хыççăн фестиваль кубокне хăйсене тавăрма вăй çитернĕ. Çĕнтерÿçĕсен команди – Алексей Алексеев, Евгений Георгиев, Станислав Пугачев, Неля Скорева тата Таня Амбрашкина.
Уйрăм тупăшусенчи кăтартусем аван: йĕлтĕрпе чупса эстафетăра пĕрремĕш вырăн, канат туртса тата армспорт енĕпе – иккĕмĕшсем. Вĕсенче пухнă пысăк баллсем ытти ултă командăна пурне те кая хăварма пулăшнă.
Калининăри психикăпа неврологи интернатĕнче ĕçлекенсем тата кунта сипленекенсем министерство ирттернĕ «Врачпа пĕрле уçăлса çÿретĕп» акцие те хастар хутшăннă. Февралĕн 1-мĕшĕнче пурте пĕрле спорт утти енĕпе тус-юлташла ăмăртăва тухнă.
Тĕрĕссипе, çакăн евĕр спортпа сывлăх кунĕсем интернатра пĕрмаях пулаççĕ – сывă пурнăç йĕркине тытса пырасси кунта ырă йăлара.
И.ЯКОВЛЕВА.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии