09:50 12 февраля 2014 г.
Сочи хулинче иртекен Хĕллехи Олимп вăййисен факелĕ районти шкулсене куçса çÿрет. Олимп çулăмĕн эстафети Вăрнарти 2-мĕш шкултан Хапăсри шкула куçрĕ. Олимп факелне илсе килме чи пултаруллă, спортпа туслă ачасем тивĕçрĕç, вĕсем: Лариса Лапташкина, Андрей Кузнецов, Ирина Ефремова, Филипп Почемкин, Илья Ильдуганов, Андрей Быков, Александр Шашкин, Владимир Канькин, Геннадий Григорьев, Анжелика Петрова, Татьяна Ефремова. Вăрнарпа Хапăс ачисем Кивьял Хапăс патĕнче тĕл пулчĕç.
Олимп факелĕ Хапăс шкулне çитнĕ ятпа савăнăçлă линейка иртрĕ. Унта хисеплĕ те хаклă çынсем килсе çитнĕ. Ку шкулта вĕреннĕ, спортра пысăк çитĕнÿсем тунă ентешсем: Галина Павлова (Кузнецова полиатлон енĕпе Раççей спорт мастерĕ), Владимир Тикинев (полиатлон енĕпе спорт мастерĕн кандидачĕ), Михаил Павлов (йĕлтĕрçĕсен тренерĕ), Николай Есенцев (бокс енĕпе ЧАССР чемпионĕ, республикăри тĕрлĕрен ăмăртусен чемпионĕ тата призерĕ) хутшăнчĕç.
Вĕренекенсем Олимпиада гимнне юрларĕç, видеороликпа паллашрĕç. Хĕр ачасем Елена Аликова хатĕрленĕ аэробика номерĕпе савăнтарчĕç.
Олимп факелĕ пур класра та пулчĕ, кашниех ăна алла тытса курчĕ. Ачасем асăнмалăх сăн ÿкерттерчĕç.
Хапăс тăрăхĕнче пурăнакансем яланах спорт енĕпе малтисен ретĕнче пулнă. Николай Есенцев, Галина Павлова, Владимир Тикинев, Алексей Шоркин, Андрей Сюмайкин, Эльвира Чугунова, Михаил Павлов тата ыттисем пысăк çитĕнÿсемпе палăрнă.
Халĕ та Хапăс шкулĕнчи ачасем спортпа питĕ туслă. Вĕренекенсем баскетболла выляса, кире пуканĕ йăтассипе, йĕлтĕрпе чупассипе, çăмăл атлетикăра, теннис вăййинче яланах малтисен йышĕнче. Пултаруллă çамрăк спортсменсем: Ф.Почемкин, А.Петрова, Н.Тикинева, Л.Лапташкина, М.Федотов, В.Канькин, М.Петров, Г.Григорьев.
Лариса ХАРИТОНОВА,
Хапăс шкулĕнче вĕрентекен.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии