09:07 12 февраля 2014 г.
Вăрнарти «Химик» спорт клубĕн «Химик-Августăн» 1998 çулта çуралнă каччисем футбол енĕпе Хусан хулин хĕллехи уçă первенствин çĕнтерÿçисем пулса тăчĕç
Вăйăсем иртнĕ çулхи декабрьте пуçланчĕç, вĕсем Хусанти «Рубин» команда хатĕрленекен база никĕсĕ çинче тата футболпа çăмăл атлетика манежĕсенче иртрĕç. Палăртмалла, Хусан первенствинче тупăшакан 12 командăран Вăрнарти çамрăк химиксем Чăваш енрен пĕртен-пĕр команда кăна пулчĕç. Ыттисем пурте – Хусанти тата Зеленодольскри ятарлă футбол шкулĕн тата ачасемпе çамрăксен спорт шкулĕсен футбол уйрăмĕсен командисем.
Регламентпа командăсем икĕ ушкăна пайланса вылярĕç. «Химик-Августăн» тупăшурисем – Вахитов районĕн «ДЮСШ», Хусанти ача-пăча спорт шкулĕсен «Приволжанин», «Мотор» тата «Динамо», «Зеленодольск» спорт шкулĕн командисем. Пирĕн ачасем хăйсен ушкăнĕнче çухату тÿсмерĕç, Вахитов районĕн каччисемпе кăна тĕл пулу никам çĕнтерейменнипе (1:1) вĕçленчĕ. Çапла хăйĕн ушкăнĕнче 13 очко пуçтарса пĕрремĕш вырăн йышăнчĕç.
Финалăн пĕрре-тăваттăмĕш пайĕнче «Химик-Август» «Мирас» командăна 2:0 шутпа парăнтарчĕ. Январĕн 26-мĕшĕнче çамрăк химиксем «Тасма» футболисчĕсене çĕнтерме нимĕнле шанăç та памарĕç. Матчăн 26-мĕш çеккунтĕнчех А.Афанасьев гол тапса кĕртрĕ. Ку турнирăн «чи хăвăрт» голĕ пулчĕ. Хусансене 3:0 шутпа çĕнтерсе Вăрнар районĕн çамрăк каччисем финала путевка выляса илчĕç.
«Химик-Август» ку турнира виççĕмĕш хут хутшăнчĕ, пĕрремĕш хут финала тухрĕ. 2011–2012 çулсенче виççĕмĕш вырăн, пĕлтĕрхи сезонра тăваттăмĕш вырăн йышăннăччĕ.
Спортри тĕрĕслĕх çакăнта аван курăнать: тренировкăсенче хăть мĕн чухлĕ тар юхтарсан та, ăмăрту практикисĕр ăнăçу тума май çук. 1998 çулта çуралнă каччăсемшĕн республика, Раççей ăмăртăвĕсене хутшăнни ăсталăха туптамалли чи лайăх мел пулса тăчĕ. Вĕсен çитĕнĕвĕсем пирки районти «Çĕнтерÿ çулĕ» хаçат паллаштарсах тăчĕ. Хальхинче те Александр Борисович Строгановăн тĕллевлĕ, çав тери кăткăс ĕçне палăртас килет. Çамрăк футболистсен çитĕнĕвне пула халĕ Вăрнар поселокĕ пирки Хусанта та, Чулхулара та, Саранскра та, Йошкар-Олара та, Дзержинскра та хисеппе калаçаççĕ, ачасене вара Вăрнар районĕн «спорт посолĕсемпе» танлаштармалла.
Финал патне таврăнар-ха. Февралĕн 9-мĕшĕнче Вăрнарти хутăш препаратсен завочĕн хăтлă автобусĕ çамрăк футболистсемпе тата вĕсемшĕн «чирлекенсемпе» инçе çула тухрĕ. Хусанта пире Вахитов районĕн «ДЮСШ» команди кĕтрĕ. Каламалла, ку спорт шкулĕн пур ÿсĕмри футболисчĕсем те мĕнпур ăмăртура лидерсен йышĕнчен чакман.
Пирĕн ачасен çакăн пек вăйлă командăпа тупăшма тиврĕ. Вĕсемпе, паллах, малтанхи тапхăрта выляма тÿр килнĕ. Çÿлерех асăнтăм, матч 1:1 шутпа вĕçленнĕччĕ. Ун чухне вăйă искусствăлла уйра пулнăччĕ, хальхинче вара – манежра. Хусана çитсен пирĕн футболистсем виççĕмĕш вырăншăн пыракан вăйăн пайне пăхрĕç. Хыççăн А.Строганов вылякансен йышне палăртрĕ, кăтартусем пачĕ. Мана ачасем пăлханманни, шÿтлени савăнтарчĕ. Команда руководителĕ пулнă май, вĕсене вăйă вăхăтĕнче дисциплинăна пăхăнмаллине асăрхаттартăм, вĕсене хăйсем Чăваш ен чемпионĕсем пулнине аса илтертĕм, пуçласа Хусан хулин первенствинче те пĕрремĕш пулсан тем пекех лайăх пулмаллине палăртрăм. Ачасем те хавхаланчĕç.
Финал пысăк кăмăл-туйăмпа иртни сисĕнчĕ. Çиччĕмĕш минутра Артем Афанасьев тапăнса вылякан хусансен хапхине мечĕке мăнаçлăн тапса кĕртрĕ.
Чунра лăпкăлăх çуралчĕ, футбол уйĕнче вара çав тери хĕрÿ вăйă пычĕ. Пирĕн футболиста дисциплинăна пăснăшăн сарă карточка пачĕç. Денис Павлов, пуçпа тÿрремĕн тĕртсе пачĕ пулин те, пушă хапхана гол кĕртеймерĕ. Хÿтĕлевçĕ йăнăш тунипе пирĕн хапхана та кăшт кăна мечĕк тапса кĕртетчĕç. Юрать, вратарь – Евгений Анюров – тимлĕ пулчĕ. Финалта вăл хапхара çав тери сыхă тăчĕ, пĕр мечĕке те хăйĕнчен ирттермерĕ.
Иккĕмĕш таймра та пирĕн команда ытларах тапăнса вылярĕ. Дмитрий Михайлов хусансен хÿтĕлевçипе вратарьне улталаса тепĕр гол тапса кĕртрĕ. Çапла финал шăхличĕ Вăрнарти «Химик-Август» пуçласа Хусан хулин первенствин чемпионĕ пулнине пĕлтерчĕ.
Тапса кĕртнĕ мечĕксен шучĕпе (4-шар) Егор Дмитриев тата Артем Афанасьев чи лайăх вылякансем пулса тăчĕç. Командăна Кубокпа тата дипломпа чысларĕç. Мĕнпур футболиста, Александр Строганов тренера пысăк тав. Чăваш футболĕн ятне Вăрнар команди çÿле çĕклерĕ.
Çуллахи футбол сезонне – Чăваш ен тата Раççей («Приволжье» зонăра) первенствисем – хатĕрленессин пĕрремĕш тапхăрĕ тивĕçлĕ вĕçленчĕ, умра – çĕнĕ вăйăсем, тренировкăсем...
Çĕнтерÿ тума пулăшнă ытти çынсене те тав сăмахĕ калас килет. Чи малтанах ашшĕ-амăшне, вĕсем ачисене ир-ирех хăйсен транспорчĕпе илсе килеççĕ, каçхине Вăрнарта кĕтсе илеççĕ. Команда поселок ачисенчен кăна тăмасть-çке, ялтан çÿрекенсем те пур. Инçе çула ăнăçлă илсе кайса килнĕшĕн Иван Маслячкин водителе тав тăватăп.
Паллах, «Август» Фирма, унăн генеральнăй директорĕ Александр Усков хăй, «Вăрнарти хутăш препаратсен завочĕ» филиалĕн директорĕ Владимир Свешников укçа-тенкĕ енчен пулăшман тата хавхалантарман пулсан, Вăрнар район ачисем Хусан первенствине хутшăнаяс та çукчĕ. Вĕсем пирĕн команда нушине яланах чĕре çывăхне илни савăнтарать.
Евгений ЗАХАРОВ,
«Химик» спорт клубĕн председателĕ.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии