09:30 10 февраля 2014 г.
«Янгорчино» ял хуçалăх кооперативĕнче çамрăк кадрсене вырăнта хăварассипе тĕрлĕ хавхалантару мелĕпе ĕçлеççĕ. Вăл шутра – Чăваш ен Пуçлăхĕн стипендине илме пулăшасси те.
Маларахри çулсенче патшалăх пулăшăвне ку хуçалăхран Александр Раков тата Владимир Никифоров механизаторсем тивĕçнĕччĕ. Кăçал чыс-сумлисен йышне Татьяна Якимова бухгалтер хушăннă.
Татьяна «Янгорчино» хуçалăх бухгалтерийĕнче виççĕмĕш çул тăрăшать. Канашри финанс техникумне пĕтернĕ, каярахпа куçăмсăр майпа Шупашкарти кооператив институтĕнче пĕлÿ илнĕ.
26-ри çамрăк хĕрарăмăн, хальлĕхе пĕр ача амăшĕн, таса чунĕ, сăпайлăхĕ тÿрех сисĕнет. Стипендиат пулса тăни хăйĕн кăна мар, ĕçтешĕсен тивĕçĕ те пулнине палăртать. Бухгалтеринче пĕтĕмпе çиччĕн тăрăшаççĕ. «Аслăрах ĕçтешсем пулăшса-вĕрентсе пыман пулсан çак чыса, тен, тивĕçеймĕттĕм те», – тет вăл. Шут ĕçченĕ чи пысăк тав сăмахне, паллах, хуçалăх ертÿçине Геннадий Васильевич Романова халаллать. «Вăл пире хăйĕн тĕслĕхĕпе яла, хуçалăха аталантарма, çуралнă вырăнтах çитĕнÿсем тума вĕрентсе пырать», – тет Татьяна.
С.ЧИКМЯКОВА.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии