16:23 04 февраля 2014 г.
Иртнĕ шăмат кун Вăрнар – Упи – Красноармейски автоçулăн 18-мĕш километрĕнче Канашра пурăнакан Н. айăпĕпе инкек тухнă. 39-ти водитель, УАЗ машинăпа пынăскер, руле тытса чараймасăр тăрук хирĕç çул çине тухса Шевроле Ланоспа «тĕл пулнă». Иккĕмĕш машина водителĕпе пассажирне Канашри тĕп больницăра пĕрремĕш медицина пулăшăвĕ панă хыççăн киле янă.
Вырсарни кун ирхине Кивĕ Мĕлĕш ялĕ çывăхĕнче çын виллин юлашкисене (шăмми-шаккисене) тупнă. Малтанхи кăтартусем тăрăх, вăл пĕлтĕр çуллах çухалнă, Вăрнарта пурăннă 80-ри хĕрарăм пулма пултарать тесе шутлаççĕ. Октябрьте çак вырăнтан инçех мар унăн япалисене – хура калушпа хăмăр тутăр – тупнă.
Районта пахалăхсăр алкогольлĕ шĕвексем сутнине палăртассипе тĕрĕслевсем иртнĕ. Çавна май кĕçнерни кун Вăрнарти тата Отиккăвăри лавккасенче контрафакт паллиллĕ шурă эрех тупнă. Ку алкогольлĕ продукцие тавар çаврăнăшĕнчен кăларнă, экспертизăна янă.
Январĕн 24-мĕшĕнче каçхине Вăрнарти тĕп больницăна вар-хырăм пăсăлнипе иккĕри арçын ачана илсе килнĕ, ăна «гастроэнтерит» диагноз лартнă. Тепĕр кунне, ирхине 1 сехетре, çакăн пек чир паллисемпех иккĕри хĕрачана реанимаци уйрăмне хунă. Сывлăхĕсем лайăхланнă хыççăн ачасене инфекци уйрăмне куçарнă. Вĕсем мĕнле майпа наркăмăшланма пултарнине палăртас тĕллевпе тĕрĕслев пырать.
Волонтерти пĕр çамрăк хăйĕн банк картти çинчен 2650 тенкĕ çухални çинчен шалти ĕçсен пайне пĕлтернĕ. Унăн телефонĕ çине ку укçапа темĕнле тивĕçтерÿшĕн тÿленине хыпарлакан СМС килнĕ иккен. Укçа çамрăк хăй унччен маларах усă курнă абонент номерĕ çине куçнă.
И.СЕРГЕЕВА.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии