16:21 04 февраля 2014 г.
Юлашки вăхăтра полицие граждансем банк карттинчен укçа çухални çинчен пĕлтернисем нумайланчĕç. Хăйсем нимĕнле операци ирттермен пулин те укçа чакса пырать е вуçех çухалать мĕн.
Полици сотрудникĕсем ку тĕслĕхсемпе тĕплĕ тĕрĕслев ирттернĕ. Палăртнă тăрăх, шар курнисем пурте хăйсен телефон номерĕсем урлă «Мобильлĕ банк» тивĕçтерÿпе усă курнă, карттăпа çыхăннă операцисем çинчен мĕнпур информацие пĕлсе тăнă. Анчах вĕсем телефон номерне улăштарсан унчченхи çинчен «Мобильлĕ банк» тивĕçтерĕве сÿнтермен. Çакă хакла ларнă та банк карттисен хуçисене. Вĕсен кивĕ телефон номерĕсем каярахпа урăх çынсене лекнĕ. Çĕнĕ абонентсем номерĕн малтанхи хуçисен картти çине укçа хушăнни пирки информацие илсе тăнă. Хăшĕ-пĕрисем ултавлă майпа ют укçапа усă курма та именмен. Паллах, çакă саккуна пăсни шутланать, вĕсене РФ Уголовлă Кодексĕн 158-мĕш статйипе (ют пурлăха вăрлани) айăплаççĕ.
«Мобильлĕ банкпа» усă куракансене пурне те асăрхаттаратпăр: хăвăрăн абонент номерне ылмаштаратăр пулсан ку тивĕçтерĕве сÿнтерме заявлени çырма ан манăр.
Тепĕр саманта асра тытăр: енчен те сирĕн телефон çине укçа куçни пирки кĕтмен СМС-хыпарсем килеççĕ-тĕк, тÿрех банк ĕçченĕсене пĕлтерĕр.
Тепĕр ултав мелĕ те анлă сарăлнă: мушенниксем «сирĕн банк карттине чарса лартнă» текен СМС-хыпарсем салатаççĕ. Ку номерпе каялла шăнкăравласан сире карттăна çĕнĕрен ĕçлеттерсе яма тĕрлĕ цифрăсен комбинацине пусма сĕнеççĕ. Çакăн евĕр операцисем хыççăн укçана хăвăр алăпах ултавçăсен кĕсье телефонĕсен номерĕсем çине куçарса паратăр.
Çавăнпа та асăрхануллă пулăр: ултавçăсен серепине ан çакланăр. Шанчăксăр СМС-пĕлтерÿсем çине нихăçан та ан хуравлăр, кирлĕ информацие банк уйрăмĕсенче ыйтса пĕлĕр.
А.ГУБАНОВ,
Раççей Шалти ĕçсен министерствин «Вурнарский» пайĕн пуçлăхĕ
полици подполковникĕ.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии