16:07 04 февраля 2014 г.
Кÿстÿмĕрти вăтам шкулти 11-мĕш класа чăннипех те спортпа туслă класс темелле. Алик Волков, ав, кире пуканĕн спортĕнче пысăк çитĕнÿсем тăвать. Унăн тусĕ Василий Антипов вара – карате енĕпе.
Василий çак кунсенче кăна Мюнхенран (Германи) пĕтĕм тĕнчери уçă чемпионатран таврăннă. Çулĕпе çамрăкрах пулин те карате сетокан енĕпе вăл 18 çултан аслăраххисем хушшинче пĕрремĕш вырăн йышăннă.
Ку – каччăн пĕрремĕш çитĕнĕвĕ мар. Виçĕм çул вăл тĕнче чемпионачĕн бронза призерĕ пулнăччĕ. Раççейĕн пĕрре мар чемпионĕ.
Ку тĕспе 2-мĕш класранах туслă. Халĕ «Химик» спорт клубĕнче Алексей Владимирович Владимиров патĕнче ăсталăха туптать. Эрнере икĕ хутчен Вăрнара çÿрет. Тепĕр чухне – Шупашкара, кунта вăл республикăри карате федерацийĕн президенчĕ Владимир Тимофеев патĕнче уроксем илет.
Каратене Василий пуçĕпех чăмнă теме çук. Йĕлтĕрпе чупассипе те ăна районти ăмăртусенче курма пулать. Кăçалхи «Раççей йĕлтĕр йĕрĕнче» вăл кĕмĕл призер пулса тăчĕ. Çăмăл атлетикăпа, волейболпа туслă.
Çапах та юратнă тĕсĕнче хăйĕн вăйне, ăсталăхне кăтартма май туса панишĕн çамрăк каччă «Химик» спорт клубне, унăн председательне Евгений Захарова, тренерсене тав тăвать.
С.ЧИКМЯКОВА.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии