16:01 04 февраля 2014 г.
Чăваш кĕнеке издательствинче «Халăх ăстисен опытĕнчен» ярăмри тепĕр тĕлĕнмелле издани – Г.Иванов-Орковăн «Т.Шаркован чăваш тĕррисемпе пуканисем» çĕнĕ кĕнеки кун çути курнă. Ăна Раççей культура тава тивĕçлĕ ĕçченĕн, республикăн тава тивĕçлĕ художникĕн Т.Шаркован пултарулăхĕн чи паха та çутă енĕсене халалланă.
Геннадий Иванов–Орков автор шухăшĕпе, ку кĕнеке-альбом çак ярăмпа тухнă ытти кăларăмсенчен кăткăсрах содержанипе тата материал пуянлăхĕпе уйрăлса тăрать. Кунта искусствăн темиçе тĕсне (тĕрре тата пукане илемне) пăхса тухнă, чăваш халăхĕн тумтирĕн эрешĕсен ыйтăвне те хускатнă. Кĕнекене тĕрлĕ сăрăллă сăн ÿкерчĕксемпе пуян илемлетнĕ.
Гуманитари ăслăлăхĕсен чăваш патшалăх институчĕпе чăваш кĕнеке издательствин пĕрлехи проекчĕ те пурнăçа кĕнĕ – «Чăваш Республикин археологи картти» çĕнĕ кĕнеке пичетленсе тухнă. Авторсем издание паллă ученăй-археолога, педагога тата общество деятельне В.Каховскине халалланă.
Республикăн археологи картти – аваллăх палăкĕсем çинчен пухнă материалсене пĕрлештерекен энциклопеди евĕрлĕ пĕрремĕш издани.
Кĕнекен тĕп пайĕ – республикăри аваллăх палăкĕсем çинчен çырнă статьясем. Вĕсенче – палăксен ячĕсене, вырăнне, калăпăшĕпе виçине, ăна тĕпченин историне, культура сийĕн палли пирки тата ытти сведенисене кĕртнĕ.
Карттăра ученăйсемпе таврапĕлÿçĕсем XIX ĕмĕрĕн варринчен пуçласа XXI ĕмĕр пуçламăшĕччен тупса палăртнă мĕнпур палăк пур.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии