15:49 04 февраля 2014 г.
Хăйĕн ячĕпе иртекен турнир чи малтанах çак тĕллеве «йĕрленине» пĕлтерчĕ Чăваш Патшалăх Канашĕн Председателĕ Юрий Попов, Вăрнарта пухăннă спортсменсене ăмăрту умĕн ăнăçу суннă май. «Çамрăк гиревиксен тĕслĕхĕпе чылайăшĕ сывă пурнăç йĕркине явăçасса шанас килет», – терĕ вăл.
Вăрнар çĕрĕ çинче республикăри чылай паллă çынна, Чăваш Патшалăх Канашĕн депутачĕсене пуçтарчĕ ырă вăй турнирĕ. Спортсменсем хăйсем 200-е яхăн. Помост çине тухакансене , 25-мĕш Олимп вăййисен кĕмĕл призерĕ, 26-мĕш Олимп вăййисен чемпионĕ Елена Николаева депутат, район администрацийĕн пуçлăхĕ Леонид Николаев, Чăваш Республикин Министрсен Кабинечĕн председателĕн заместителĕ – ял хуçалăх министрĕ Сергей Павлов, республикăри спорт министрĕ Сергей Мельников, Раççей тава тивĕçлĕ тренерĕ, ку ăмăртăвăн тĕп судйи Сергей Бронников, ытти хăнасем, Калинино шкулĕн кадечĕсем, «Химик» спорт клубĕн фитнес-аэробика ушкăнĕ, артистсем саламларĕç.
Чи кăсăкли, паллах, йăлтах помост çинче пулчĕ. Кире пуканĕ йăтакансем хушшинче ку тĕсре самай пысăк çитĕнÿсем тунă спортсменсем пулчĕç пулин те, чун пурпĕр Вăрнар каччисемпе хĕрĕсен результачĕсемшĕн вĕчĕрхенчĕ. Республикăн 3-мĕш уçă турнирне вуннăн хутшăнчĕç вĕсем: Денис Тимофеев, Алик Волков, Александр Ефимов, Екатерина Козлова, Дмитрий Ястребов, Денис Слонов, Валентина Мышкина, Анастасия Шумилова, Николай Данилов тата Леонид Федоров. Кашниех тĕрлĕ виçе категорийĕнче тĕрлĕ виçеллĕ кире пуканне йăтрĕ. Спорт мастерĕ Денис Тимофеев тĕртсе 32 килограма 55 хутчен, Алик Волков 24 килограма 73 хутчен, туртăнтарса Денис – 78, Алик 111 хут çĕклерĕç.
Ачасемпе çамрăксен спорт шкулĕн тренер-преподавателĕ Анатолий Федотович Иванов малтанласа каланă пекех вĕсем призерсен йышне кĕчĕç. Тĕрĕсрех, иккĕшĕ те турнир чемпионĕсем пулса тăчĕç.
Çавăн пекех кĕмĕл медаль илме Ярмушкари Катя Козловапа Кÿстÿмĕрти Валентина Мышкина та пьедестал çине улăхрĕç. Пĕр шутласан, спортăн пăхаттир тĕсĕ хĕрсем валли мар пек. Кĕлеткене пăсать, самăрлатать тейĕ тепри. «Йăнăш шухăш, – терĕ районти пултаруллă спортсмен Денис Тимофеев. – Раççей турнирĕсенче модель кĕлеткиллĕ хĕрсем помост çине тухаççĕ. Тĕрĕссипе, ку тĕс мышцăсен ушкăнне витĕм кÿмест, вăй тата чăтăмлăх кирлĕ. Кире пуканĕн спортне йĕлтĕр спорчĕпе танлаштармалла...».
Хурăн Кăкшăмри Саша Ефимов ăмăртăва хутшăнма Мускавран килсе çитнĕ. Усăллă темелле. Хăйĕн ÿсĕмĕнче вăл бронза медале тивĕçрĕ. Шупашкарта пурăнакан Николай Данилов (Катăшра çуралса ÿснĕ) та вăрнарсен командишĕн помост çине тухса усă пачĕ – 1 разрядлă спортсмен иккĕмĕш вырăн йышăнчĕ кăна мар, Вăрнар район командине пĕтĕмĕшле результатпа виççĕмĕш вырăна тухма май пачĕ.
Юрий Попов парнисемшĕн иртнĕ турнир программи пуян пулчĕ. Официаллă пайра Чăваш Патшалăх Канашĕн спикерĕ Республика Пуçлăхĕн районти кăçалхи стипендиачĕсене свидетельствăсемпе чысларĕ. Вăрнарти 1-мĕш вăтам шкул учительне, шашка енĕпе районăн яланхи, республикăн пилĕк хутчен чемпионĕсене, Пĕтĕм Раççейри, тĕнчери ăмăртăвĕсен участникĕсене хатĕрлекене Григорий Иванович Степанова Чăваш Патшалăх Канашĕн Хисеп грамотине алă тытса пачĕ.
Çакна та каламалла, çав кун районти спорт пĕрлешĕвĕшĕн питĕ ĕçлĕ кун пулчĕ. Физкультура учителĕсенчен чылайăшĕ судьяра ларчĕ, волонтерсен ĕçне пурнăçларĕ.
С.ЧИКМЯКОВА.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии