15:46 04 февраля 2014 г.
Вăрнар районĕнче Культура çулталăкне уçнă ятпа чаплă мероприяти иртнĕ. Поселенисем хушшинчи культурăпа кану центрĕн фойинче ал ĕçĕсен куравĕнче районти ăстасен илемлĕ япалисемпе паллашма май пулнă. Районта чылаййăн вĕсем, пултаруллă çынсем: Вăрманкасри Г.Кошкин, Н.Кузьмин, Çĕньял Хапăсри Т.Михайлова, Упнерти Н.Сергеева, ыттисем.
Чăваш Республикин культурăн тава тивĕçлĕ ĕçченĕ Владимир Михайлов ăсталакан музыка инструменчĕсен чапĕ Пĕтĕм Раççейĕпе саланнă. Вăл чăвашсен ÿнер йăлисене сыхласа хăварассипе тимлекенсенчен пĕри. Куравра унăн инструменчĕсемпе паллашма май пулнă.
Тĕрĕсемпе, çыхнă, явнă япаласем çумĕнче Вăрнарти Фаина Александрован джинса «иккĕмĕш ĕмĕр» парнеленĕ япалисем те тивĕçлĕ вырăн тупнă.
Сцена çине районти чи пултаруллă коллективсем тухнă. Культура çулталăкĕ уçăлнине пĕлтерсе район администрацийĕн пуçлăхĕн заместителĕ Николай Петров вĕсене, культурăна аталантаракансене, чĕререн тав тунă.
Культура çулталăкне халалласа кăçал районта мероприятисем уйрăмах нумай ирттерме палăртнă.
Л.ИВАНОВА.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии