15:42 04 февраля 2014 г.
«Раççей йĕлтĕр йĕрĕн» Вăрнарта иртнĕ кăçалхи тапхăрĕ каллех рекорд çапрĕ – старта пĕтĕмпе районта пурăнакан 934 çын тухрĕ
– Питĕ кăсăклă, шучĕпе миçемĕш-ши; – ыйтрăм çĕнтерÿ пьедесталĕ çинчен аннă Георгий Никишовран ылтăн медальне алăра çавăрса.
– Нумай мар, пĕр чăматан кăна...
Вăрнарта пурăнакан спортăн пысăк тусне, чăн та, кашни массăллă чупурах çĕнтерÿçĕсен йышĕнче курма кăмăллă. Вăл темиçе ăрушăн та – чи паха тĕслĕх вырăнĕнче. 70-тен иртнĕскер, чупура та, йĕлтĕрпе те тепĕр çамрăкран та ирттерет.
Çакнашкал çынсем пулсан, республикăна «спортпа чи туслă регион» ята алăра тытса хăварма пулăшма, ятарлă программăра çырнă пек Чăваш енри кашни иккĕмĕш çынна спортпа туслаштарма май пулĕ.
Патшалăх политикин ку çул-йĕрĕсене Чăваш Патшалăх Канашĕн Председателĕ Юрий Попов та, район администрацийĕн пуçлăхĕ Леонид Николаев та ахальтен асăнмарĕç ĕнтĕ. Сывă пурнăç йĕркин стилĕпе пурăнни – район, республика, çĕр-шыв пуласлăхĕшĕн тăрăшни пулнине, суйласа илнĕ çак курсран çирĕп тытăнмаллине, сывă çын кăна ÿсĕм-çитĕнÿсем тума пултарнине тепĕр хут аса илтерчĕç вĕсем. Хăйсем, ĕçпе спорта çирĕп çыхăнтараканскерсем, хальхинче те куракансен йышĕнче тăмарĕç, VIP-чупу дистанцине çăмăллăн парăнтарчĕç.
Çÿллĕрех пуçлăхсен ырă тĕслĕхĕ вырăнти ертÿçĕсене те хавхалантарни çулсерен ытларах та ытларах сисĕнет. Йĕлтĕр çине вĕсем кăçал тата йышлăн тăчĕç: район администрацийĕн пай, ял-хула поселенийĕсен, Перекет банкĕн Вăрнарти офисĕн, Калинино райповĕн, Раççей Пенси фончĕн районти управленийĕн, ача-пăча ÿнер шкулĕн, ытти предприяти-организаци ертÿçисем, район больницин тĕп врачĕ.
Йышпа, паллах, шкул ачисене çитекен çук. Сăнанă тăрăх, ку чупăва пĕр шкул юлмиччен хастар хутшăнаççĕ. Уйрăмах çемйипе (Мăньял Хапăсри Тикиневсем, Вăрнарти Федоровсем, Романовсем, Туçи Çармăсри Волковсем) старта тухакансене, ялта ĕçлесе пурăнакансене курма кăмăллă.
«Химик» стадион ик-виç сехет кĕрлесе кăна тăчĕ. Спортсменсем футбол уйĕнчен старт илсе вăрман витĕр выртнă йĕрпе вĕçтерчĕç. Дистанцие вунă ытла тапхăрпа тухрĕç вĕсем.
Ку тĕспе профессионаллă кăсăкланакансене тÿрех уйăрма май пулать. Хапăсри, Вăрманкасри, Чăрăшкас Хирлепри, Калининăри, Ярмушкари, Туçи Çармăсри, Кÿстÿмĕрти шкулсенче вĕренекенсем трасса çинче вĕçсе кăна пыраççĕ.
Ача ачах çав. Вĕсен сăнĕсенче кашниннех çĕнтерес туйăмне курма пулать. Пĕтĕм вăйран пĕр-пĕрне хăваларĕç вĕсем. Çавăнпах-тăр, ÿкекенсем чылай пулчĕç. Чалăм Кăкшăмри Настя Андрееван ав туйи хуçăлса кайрĕ, апла пулин те километра çаврăнса финиша хăй ÿсĕмĕнче 5-мĕш е 6-мĕш çитрĕ.
Кашни тапхăрăн, кашни ÿсĕмĕн – хăйĕн çĕнтерÿçисем. Вĕсем – Владимир Федоров, Виталий Стеклов, Сергей Киселев (Вăрнар), Владимир Тикинев (Вăрманкас ял поселенийĕ), Владимир Дмитриев (Малти Ишек ял поселенийĕ), Василий Иванов тата Нина Кондратьева (Ярмушка), Мария Павлова (Вăрман Кипек), Оксана Александрова (Санарпуç), Галя Павлова тата Екатерина Герасимова (ял хуçалăх техникумĕ), Валя Змеева (аш-какай комбиначĕ), ачасенчен Михаил Федотов (Хапăс), Лариса Курбатова, Павел Волков (Туçи Çармăс), Дима Данилов (Аçăмçырми), Валя Тикинева, Галя Тикинева тата Ирина Тикинева, Катя Лукина (Вăрнарти 1-мĕш шкул), Василий Чугунов (Вăрманкас), Валентин Иванов (Ярмушка) – Хисеп грамотисене, «Раççей йĕлтĕр йĕрĕн» статуэткисене, символла калпакĕсене тивĕçрĕç.
Паллах, пьедестал çине кашниех тăраймасть, анчах çак кун старта тухакан кашни çын хăйне çĕнтерÿçĕ тесе шутлама пултарать, мĕншĕн тесен вăл спортпа туслă, ун пурнăçĕнче сиенлĕ йăласем валли вырăн çук!
C.ЧИКМЯКОВА
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии