15:26 04 февраля 2014 г.
Тунти кунсеренхи планеркăна район администрацийĕн пуçлăхĕ Леонид Николаев канмалли кунсенче иртнĕ пысăк спорт мероприятийĕсене пĕтĕмлетнинчен пуçларĕ. Чăваш Патшалăх Канашĕн Председателĕн парнисемшĕн кире пуканĕ йăтассипе иртнĕ III турнир çÿллĕ шайра иртнине, Вăрнар спортсменĕсем унта ăнăçлă ăмăртнине палăртрĕ.
«Раççей йĕлтĕр йĕрне» хутшăнакансене, йĕркелÿ ĕçĕсене туса пыракансене тав турĕ.
Малалла Леонид Николаев районăн 2013 çулхи социаллă пурнăçĕпе экономика лару-тăрăвне сÿтсе явассипе февралĕн 6-мĕшĕнче анлă лару пулассине пĕлтерчĕ.
Планеркăра Вăрнар районĕн муниципаллă пурлăхĕпе эффективлă усă курассине пăхса тухрĕç. Экономика тата пурлăх хутшăнăвĕсен пайĕн пуçлăхĕн заместителĕ Татьяна Лемаева пĕлтĕр куçман пурлăхăн икĕ объектне приватизацилеме плана кĕртнине каларĕ. Калининăри Шкул урамĕнчи 2,7 млн тенкĕлĕх хакланă 5-мĕш çурта сутлăха пĕрре кăна тăратман. Иртнĕ çул ăна туянакан пулман, çавăнпа та вăл каллех приватизаци планне кĕнĕ. Вăрнарти Илларионов урамĕнче вырнаçнă унчченхи котельнăй çуртне вара аукционра пуçламăш хакран хаклăрахпа – 690 пин тенкĕпе сутнă. Кăçал çавăн пекех Кивĕ Мĕлĕшри Администраци урамĕнчи 2-мĕш çурта харпăрлăха куçармалла.
2013 çулта муниципаллă пурлăха арендăна панинчен бюджета 7 миллиона яхăн тенкĕ, муниципаллă пурлăха тата çĕр лаптăкĕсене сутнинчен 5 миллион, çĕр лаптăкĕсене арендăна панинчен 4,9 миллион тенкĕ пырса кĕнĕ.
Леонид Николаев шута илмен объектсене тупса палăртмаллине, вĕсене хуçасăрлăх тесе йышăнма кадастр паспорчĕсем хатĕрлемеллине палăртрĕ.
Район администрацийĕн пуçлăхĕ халăхра çут çанталăк газĕпе усă курнă чухне хăрушсăрлăх правилисене уямалли пирки ăнлантару ĕçĕсем ирттерме хушрĕ. Ахальтен мар – Кăмашра çемье çут çанталăк газĕпе наркăмăшланнă. 94-ри вăрçă участникне тата икĕ çулхи ачана больницăна ăсатнă. Район больницин тĕп врачĕ Николай Тинюков вĕсен пурнăçĕсем хăрушсăрлăхра пулнине пĕлтерчĕ. Шăмат кун больницăна çавăн пекех газ оборудованийĕпе тĕрĕс мар усă курса пиçсе кайнă çынна илсе пынă.
Планеркăра çавăн пекех Вăрнар поселокне тирпей-илем кĕртесси, террора хирĕçле ирттернĕ вĕренÿ пĕтĕмлетĕвĕ пирки калаçрĕç.
Л.ИВАНОВА.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии