09:30 03 февраля 2014 г.
Шупашкарта шкул ачисен спартакиадин йĕркипе фитнес-аэробика енĕпе иртнĕ Чăваш ен первенствипе уçă чемпионатĕнче вăрнарсем те палăрнă. «Химик» спорт шкулĕн Елена Аликова ертсе пыракан «NEXT» ушкăн унтан бронза медальпе таврăннă. Ача-пăча ÿнер шкулĕн «Звездочки» ушкăнĕ (ертÿçи Ольга Варюхина) пиллĕкмĕш вырăн йышăннă.
Ирĕклĕ майпа кĕрешекенсен те Чăваш ен первенствинче районшăн самаях вăй хума тивнĕ. Вăрнартан унта Виталий Трофимовăн тата Юрий Львовăн вĕренекенĕсем вун иккĕн хутшăннă. Улттăшĕ çĕнтерÿ пьедесталĕ çине хăпарма тивĕçнĕ.
Чемпионсем виççĕн – Пăваялĕнчи Анастасия Иванова, Пăртасри Яна Лукина тата Мăн Турханти Надежда Краснова.
Вăрнарти Антон Сантимер, Тĕмпекри Наталия Дмитриева тата Элмен Сунарти Мария Осипова бронза медальсене тивĕçнĕ.
Футболистсен те канма вăхăт çук. Иртнĕ эрнере вĕсем шкул ачисен спартакиади йĕркипе тупăшнă. 13 командăран пĕрремĕш вырăна Вăрнарти 2-мĕш шкул команди тивĕçнĕ. Иккĕмĕш вырăнта – Ярмушкари, виççĕмĕшĕнче Кÿстÿмĕрти шкул командисем.
Виçĕм кун çĕнтерÿçĕ-команда спартакиадăн Етĕрнере иртнĕ республикăри тапхăрне хутшăннă. Вăрнарти 2-мĕш шкулта вĕренекенсен пĕрлештернĕ команди унта вун виçĕ командăран виççĕмĕш вырăн йышăннă. Командăра – Евгений Порфирьев, Виталий Крылов, Вячеслав Иванов, Егор Дмитриев, Данил Семенов, Евгений Чикмяков, Любим Казаков, Дмитрий Михайлов, Николай Корнилов, Роман Сорокин. Ачасем пурте – «Химик-Август» тренерĕн Александр Борисович Строгановăн воспитанникĕсем.
С.ЧИКМЯКОВА.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии