09:01 03 февраля 2014 г.
Олимп факелĕн районти шкулсем тăрăх йĕркеленĕ эстафети виçĕм кун Вăрнарти 1-мĕш вăтам шкулта старт илчĕ. Кунта вĕренекен кашни ачан пысăк Олимпиадăн пĕчĕк пайне алăра тытса курма май пулчĕ – çак кун ун символĕ кашни класа çитрĕ.
Хыççăн шкулăн актовăй залĕнче ку ятпа уяв иртрĕ. Шкул директорĕ Елена Ильинична Григорьева тата Вăрнар хула поселенийĕн пуçлăхĕ Алексей Александрович Владимиров эстафетăна наци пĕрлĕхне йĕркелес тата кашни çынра Олимпиадăна çывăх пулас туйăма вăратас тĕллевпе ирттернине палăртрĕç. Шкул ачисем сцена çине кăларнă номерсем те ку темăпа çыхăнчĕç. Хĕрачасем акă хăйсен спорт ташшинче ункăсемпе тĕнче Олимпиадин эмблемине çĕклерĕç.
1-мĕш вăтам шкулта вĕренекен спортсменсем – тĕрлĕ тĕсре район, республика, Раççей ăмăртăвĕсен çĕнтерÿçисемпе призерĕсем – Сочире февралĕн 7-мĕшĕнче пуçланакан Хĕллехи XXII Олимп вăййисен тĕп саманчĕсемпе паллаштарчĕç, Кубоксемпе шествие тухрĕç. Уяв шкул ачисем Раççей тата Чăваш ен Гимнĕсене пĕр саслăн юрланипе вĕçленчĕ.
Çак шăмат кун Олимпиада символĕ ачасемпе çамрăксен Вăрнарти спорт шкулĕнче пулĕ, района пысăк ăмăртăва пухăнакансене савăнтарĕ.
С.ЧИКМЯКОВА.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии