10:38 29 января 2014 г.
Район администрацийĕн пуçлăхĕ Леонид Николаев черетлĕ планеркăна ырă хыпартан пуçланă – Вăрнар районĕ патшалăх влаç тата вырăнти хăй тытăмлăх органĕсен 12-мĕш спартакиадинче иккĕмĕш вырăн йышăннăшăн Кубока тата диплома тивĕçнĕ. Наградăпа чемпионсен каçĕнче Чăваш ен Пуçлăхĕ Михаил Игнатьев чысланă.
Темăна тăсса Л.Николаев районта ку шăмат кунпа вырсарни кун пысăк спорт ăмăртăвĕсем – Чăваш Патшалăх Канашĕн Председателĕн Юрий Поповăн парнисемшĕн кире пуканĕ йăтассипе 3-мĕш республика турнирĕ тата «Раççей йĕлтĕр йĕрĕ» чупу – пуласси çинчен аса илтернĕ. Халĕ ку енĕпе хатĕрленÿ ĕçĕсем пыраççĕ.
Малалла суд приставĕсен службин районти пайĕн пуçлăхне Алексей Гончарова итленĕ. 2013 çулта пурнăçламалли 12029 ĕç килнĕ, вĕсем тĕлĕшпе 157 миллион тенкĕлĕх пурнăçлав ĕçне пуçарнă. Вĕсенчен çуррине яхăн вĕçленĕ, 33 миллион тенкĕлĕх парăм шыраса илнĕ.
Суд приставĕсем 14 миллион тенкĕлĕх налук парăмĕсене тавăрнă. Инспекци тата ГИБДД ĕçченĕсемпе пĕрле рейдсем ирттернĕ. А.Гончаров пĕлтернĕ тăрăх, районта çул-йĕр правилисене пăсакансенчен 40 проценчĕ кăна штрафсене хăйсен ирĕкĕпе тÿлет, ыттисенчен суд приставĕсем шыраса илеççĕ.
Çавăн пекех алимент тÿлеменнисем йышлă, çулталăк пуçламăшĕ тĕлне вĕсем 300-ĕн шутланаççĕ. Виçĕ бухгалтера алимент укçине вăхăтра куçарса паманшăн айăпланă.
Л.Николаев «Юнтапа» хуçалăх шăпипе кăсăкланнă. Предприятин налук инспекцийĕ умĕнче тата социаллă тÿлевсем тĕлĕшпе парăмсем пысăк. Укçа-тенкĕ ыйтăвĕсене татса пама хуçалăх ертÿçине калаçăва чĕнме йышăннă.
Районти социаллă хÿтлĕх пайĕн пуçлăхĕ Ирина Смолина федераллă тата республика саккунĕсемпе çăмăллăхсем парасси, çемьесене пулăшасси пирки каланă.
Район тĕп больницин тĕп врачĕ Николай Тинюков гриппа тата сывлав чирĕсемпе чирлекенсен шучĕ ÿсменнине пĕлтернĕ. Шалти ĕçсен министерствин «Вурнарский» пайĕн штаб пуçлăхĕ Ярослав Никифоров пулса иртнĕ тĕслĕхпе вăрăсенчен асăрханмаллине, организацисенче видеокамерăсем вырнаçтармаллине асăрхаттарнă. Иртнĕ эрнери рейдра нумай хваттерлĕ çуртсен путвалĕсемпе чартакĕсене питĕрмен тĕслĕхсем тупса палăртнă май, управляющи компанисемпе тата ТСЖ-па ку ыйтупа ĕçлессине палăртнă.
Район администрацийĕн пуçлăхĕн заместителĕ – ятарлă программăсен пайĕн ертÿçи Федор Тимофеев сивĕ çанталăкра уйрăмах ăшă тата шыв системисенче аварисем пулассинчен асăрханмаллине аса илтернĕ.
Л.ИВАНОВА.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии