09:15 22 января 2014 г.
Ку сăмахсене шăмат кун Чăваш ен Пуçлăхĕ Михаил Игнатьев пичет кунĕн уявĕнче «Çĕнтерÿ çулĕ» хаçатăн стенчĕпе паллашнă май каланă
Чăваш патшалăх академи драма театрĕн фойинче массăллă информаци хатĕрĕсен куравĕ, чăн та, республикăри мĕнпур пичет изданийĕн, издательствăпа полиграфи предприятийĕсен, телевиденин çитĕнĕвĕсене пĕрлештерчĕ. Михаил Васильевич редакторсемпе, ертÿçĕсемпе кашнинпе тенĕ пек уççăн калаçрĕ.
Сочири хĕллехи Олимп вăййисем çывхарса пыни пичет ĕçченĕсен уявĕнче те аванах сисĕнчĕ. Сцена çинче ку темăпа темиçе номер те çыхăнчĕ, фойере вара Олимп çулăмĕн факелĕпе, ăна йăтса эстафета чупнă çынсемпе сăн ÿкерĕнчĕç. Факел «Çĕнтерÿ çулĕ» ĕçченĕсен аллинче те пулчĕ.
Пухăннисене Раççей тата Чăваш пичет кунĕсем ячĕпе саламланă май, Чăваш ен Пуçлăхĕ Михаил Игнатьев журналистсене тĕрĕслĕхшĕн, республикăра пулса иртекен пулăмсене уççăн çутатнăшăн, тÿрĕлĕхшĕн тав турĕ. Чăваш ен пĕлтĕр «Спортпа чи туслă регион» наци премине çĕнсе илнинче, Шупашкар хули хăтлăлăхĕпе Раççейре иккĕмĕш вырăн йышăннинче калем ăстисен тÿпи те пысăк пулнине каларĕ. «Сире яланах малалла утма, пулăмсене тĕрĕс çутатма сунатăп, сăмахăр çивĕч, шухăшсем тата совеç таса пулччăр», – терĕ вăл.
Чăваш ен информаци политикин тата массăллă коммуникацисен министрĕн Валентина Андрееван иртнĕ çулхи ĕçсен пĕтĕмлетĕвĕнче хаçат-журнал, кĕнеке кăларас, информаци технологийĕсене аталантарас ĕçри чи курăмлă самантсем янăрарĕç. Çитĕнÿллĕ ĕçлекенсен шутĕнче хамăрăн «Çĕнтерÿ çулĕ» хаçатăн ятне илтме те кăмăллă пулчĕ: виççĕмĕш çул Раççейри «Прессăн ылтăн фондне» кĕнĕ, тираж ÿссе пырать.
Ĕçри пултарулăхшăн чыса кăçал та чылаййăн тивĕçрĕç. Палăртма кăмăллă, вĕсен йышĕнче районти «Çĕнтерÿ çулĕ» хаçатăн социаллă ыйтусен, культура тата вĕрентÿ пайĕн редакторĕ Светлана Чикмякова та пулчĕ. Профессири пысăк ăсталăхшăн панă Раççей Федерацийĕн Çыхăну тата массăллă коммуникацисен министерствин Хисеп грамотине ăна Чăваш ен Пуçлăхĕ Михаил Игнатьев саламласа тыттарчĕ.
Информаци технологийĕсем паян чăннипех те пысăк хăвăртлăхпа аталанаççĕ. Уявра акă электронлă кĕперпе пичет ăстисем патне Раççей Федерацийĕн Çыхăну тата массăллă коммуникацисен министрĕн заместителĕн Алексей Волинăн, Раççей телевиденийĕн правленийĕн членĕн Анатолий Лысенкăн тата Раççей Журналистсен союзĕн председателĕн Всеволод Богдановăн саламĕсене çитерчĕç. Чăваш ен наци телерадиокомпанийĕ вара Пичет кунне паллă тунине тÿрĕ эфира кăларчĕ.
Уявăн тепĕр ырă самантне те асăнмалла. Кăçал унта районсенче пурăнакан пичет ветеранĕсене те чĕнчĕç. Официаллă пай хыççăн икĕ ăру хушшинче йĕркеленĕ тĕл пулура Вăрнарти типографи директорĕнче 33 çул ĕçленĕ Вениамин Иванович Сорокин çак ырă пуçарушăн хамăр ведомство ертÿçине Валентина Владимировна Андреевана тав сăмахĕсем каларĕ.
(Хамăр инф).
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии