09:08 22 января 2014 г.
Тунти кун район администрацийĕн пуçлăхĕ Леонид Николаев черетлĕ планеркăра иртнĕ эрнери ĕç-хĕле пĕтĕмлетнĕ, малашнехи плансене палăртнă.
Вырсарни кун православи тĕнне ĕненекенсем Кăшарние уявланă. Вурнарка шывĕнче çак кун 100-е яхăн çын вакра шыва кĕнĕ.
Çавăн пекех журналистсем, полиграфи ĕçченĕсем Чăваш пичечĕн кунне паллă тунă. Районти «Çĕнтерÿ çулĕ» хаçат редакторĕ Вячеслав Николаев Шупашкарта иртнĕ уяв пирки каласа кăтартнă.
Чăваш енри патшалăх техника асăрхавĕн Вăрнар районĕнчи патшалăхăн аслă инспекторĕ Иван Тимофеев юлашки çулсенче уйрăм çынсем машина-трактор тытасси ÿснине палăртнă. Кăçал 181 единица техникăна регистрациленĕ, 91-шне учетран кăларнă. Пĕтĕмпе районта 1307 тракторпа хăй тĕллĕн çÿрекен машина. Вĕсенчен 700-шĕ – уйрăм çынсен. Техника тĕрĕслевĕсем февраль–август уйăхĕсенче иртеççĕ. Пĕлтĕр пĕтĕмпе 13 тĕрĕслев йĕркеленĕ. Тÿлевсен, штрафсен, патшалăх пошлинин сумми 758 пин тенкĕпе танлашнă.
Район администрацийĕн йĕркелÿ, кадр ĕçĕсен тата юридици службин пуçлăхĕн заместителĕ Татьяна Федорова суд йышăнăвĕпе нормативлă мар право акчĕсене, вырăнти хăй тытăмлăх органĕсен йышăнăвĕсемпе ĕçĕсене саккунлă мар тесе йышăннă ĕçсен тишкерĕвĕпе паллаштарнă.
Юлашкинчен февралĕн 1-мĕшпе 2-мĕш кунĕсенче районта ирттерме палăртнă пысăк мероприятисем пирки чарăнса тăнă. Вĕсем – кире пуканĕ йăтассипе Чăваш Патшалăх Канашĕн председателĕн Юрий Поповăн парнисене çĕнсе илессишĕн пулакан республика турнирĕ тата «Раççей йĕлтĕр йĕрĕ-2014» чупу.
Л.ИВАНОВА.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии