09:38 20 января 2014 г.
Районти «Çĕнтерÿ çулĕ» хаçат редакцийĕн ĕçченĕсемпе общество корреспонденчĕсем Пичет кунне лайăх кăмăл-туйăмпа кĕтсе илеççĕ.
Вăрнар район хаçачĕ Раççейри пичет изданийĕсем хушшинче ирттерекен сумлă конкурс çĕнтерÿçисен шутне виççĕмĕш хут кĕнĕ – «Раççей «Прессăн ылтăн фончĕ – 2014» Паллăна тивĕçнĕ.
Хаçата вулакансен хисепĕ çултан-çул хушăнса пыни те ырă пулăм. Ултă-çичĕ çул каялла унăн тиражĕ икĕ пин экземпляртан та сахалрах пулнă, кăçалхи январĕн 1-мĕшĕнчен вара «Çĕнтерÿ çулĕ» 4541 экземплярпа тухса тăрать. Хаçата çырăнса илекенсене те пирĕнпе пĕрле пулнăшăн чунтан тав туса уяв ячĕпе хĕрÿллĕн саламлатпăр.
Çавăн пекех хамăрăн çывăх туссене – «Çĕнтерÿ çулне» çырса тăракан общество корреспонденчĕсене, пирĕнпе тачă çыхăнса ĕçлекен партнерсене, почта ĕçченĕсене те ырă сунса уяв ячĕпе саламлатпăр.
Пичет кунĕ умĕн Мускавран тепĕр савăнăçлă хыпар çитрĕ – «Çĕнтерÿ çулĕ» хаçат редакцийĕн ял пурнăçĕн пайĕн редакторне Елена Николаевна Порфирьевăна (Тикинева), экономика тата право пурнăçĕн пайĕн редакторне Ирина Анатольевна Яковлевăна Раççей Журналистсен союзĕн членне йышăннă.
Хаçат редколлегийĕн йышăнăвĕпе «Çĕнтерÿ çулĕпе» тачă çыхăнса ĕçленĕшĕн тата Чăваш пичечĕн кунĕ ячĕпе район администрацийĕн информатизаци секторĕн тĕп специалист-экспертне Людмила Васильевна Ивановăна Хисеп грамотипе чысланă.
Пурне те хĕрÿллĕн саламласа ырлăх-сывлăх, ăнăçу сунатпăр.
Хаçат редакцийĕ.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии